აფხაზმა "ოპოზიციონერმა დეპუტატმა" ერიკ რშტუნიმ აფხაზეთის თვითგამოცხადებული რესპუბლიკის საგარეო საქმეთა სამინისტროს ხელმძღვანელს ინალ არძინბას მიმართა წერილით, რომელშიც მოსკოვიდან მიღებული "დიპლომატიური ნოტის" ასლი მოითხოვა.

მანამდე გავრცელდა ინფორმაცია, რომ სოხუმმა რუსეთის საგარეო საქმეთა სამინისტროსგან ნოტა მიიღო ე.წ. პარლამენტის მიერ ბიჭვინთაში მდებარე ყოფილი სახელმწიფო აგარაკის რუსეთისთვის გადაცემის შესახებ შეთანხმების რატიფიცირებასთან დაკავშირებით. 

მოსკოვი, სავარაუდოდ, უკმაყოფილოა იმ ცვლილებებით, რომლებიც კრძალავს ობიექტის მესამე პირებისთვის გადაცემას, წერს „ეხო კავკაზა“.

აღნიშნული ნოტის გამოქვეყნება მანამდე ოპოზიციურმა ძალებმა - პარტიებმა "აფსნიმ", "აფხაზეთის ეროვნული ერთიანობის ფორუმმა", საზოგადოებრივმა ორგანიზაციებმა "არუაამ", "აფხაზეთის სახალხო მოძრაობამ" და "ჩვენმა დედაქალაქმა" მოითხოვეს:

"ჩვენს ხელს აღმოჩნდა რუსეთის საგარეო საქმეთა სამინისტროს ნოტა, რომელშიც აფხაზეთის საგარეო საქმეთა სამინისტროს სთავაზობენ პოზიციის ჩამოაყალიბებას - დაადასტუროს თავისი რატიფიცირებამდე, შეთანხმებიდან გამომდინარე დებულებების ან მიღებული საკანონმდებლო აქტების მიმართ ერთგულება. ამასთან დაკავშირებით მოვითხოვთ, რომ აფხაზეთის საგარეო საქმეთა სამინისტრომ თავი დაანებოს ჩვეულ კულუარულ მუშაობას და გამოაქვეყნოს მითითებული ნოტა. ასევე, საზოგადოების სრული უნდობლობის გამო, მოვითხოვთ, რომ აფხაზური მხარის პასუხი წინასწარ შეთანხმდეს პარლამენტის შესაბამისი კომიტეტის მიერ დაინტერესებული საზოგადოებრივი და პოლიტიკური ორგანიზაციების ჩართულობით. წინააღმდეგ შემთხვევაში, მთელი პასუხისმგებლობა დაეკისრება პირადად აფხაზეთის პრეზიდენტს ასლან ბჟანიას და საგარეო საქმეთა მინისტრს ინალ არძინბას", - ნათქვამია მათ განცხადებაში.

ცნობისთვის, აფხაზეთის დე ფაქტო რესპუბლიკის ე.წ. პარლამენტმა 27 დეკემბერს გამთენიისას მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.

გამოცემის ცნობით, "დეპუტატებმა" ასევე დაამტკიცეს ობიექტების, მიწის ნაკვეთების, წყლის ფართობების, აშენებული შენობებისა და ნაგებობების მესამე პირებისთვის გადაცემის აკრძალვა. გარდა ამისა, აკრძალულია ობიექტებისა და ნაკვეთების გადაცემა ხელშეკრულების დენონსაციის შემთხვევაში. 

აქვე ვკითხულობთ, რომ აფხაზური ოპოზიციის ნაწილმა, ამ ზომების გათვალისწინებით დაუჭირა მხარი დოკუმენტის მიღებას. ერიკ რშტუნის კენჭისყრაში მონაწილეობა არ მიუღია.

საქართველოს საგარეო საქმეთა სამინისტრომ ბიჭვინთის აგარაკის გასხვისებასთან დაკავშირებით განცხადება გაავრცელა, რომელშიც ნათქვამია, რომ ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია. 

"ეს, როგორც ყველა სხვა გადაწყვეტილება, რომელიც ეხება აეროპორტს, რომელიც ეხება ოჩამჩირეს, არის არალეგალური და ხალხის ნების გარეშე მიღებული გადაწყვეტილება", - ასე გამოეხმაურა ბიჭვინთის "შეთანხმების რატიფიცირებას" საქართველოს პრეზიდენტი სალომე ზურაბიშვილი.