დღეს ზუგდიდის ცენტრალურ ბულვარში, ზვიად გამსახურდიას ბიუსტთან შოთა მესხიას ზუგდიდის სასწავლო უნივერსიტეტის სტუდენტების ნაწილი ე.წ აგენტების კანონის პარლამენტში მესამე მოსმენით მიღებას 17:00 საათზე გააპროტესტებს.

"სტუდენტების ნაწილმა, რომლებმაც ქვეყანაში მიმდინარე მოვლენებთან დაკავშირებით ხმა ამოვიღეთ და დავდეთ ფიცი ქვეყნის წინაშე, საქართველოს პირველი პრეზიდენტის, ზვიად გამსახურდიას ბიუსტთან ვიკრიბებით ისევ. ხელისუფლებამ მიიღო კანონი, რომელიც აზიანებს ჩვენს მომავალს და ეს აუცილებლად შეეხება ყველა ჩვენთაგანს. ახლა არ არის დუმილის დრო, ამიტომ შემოგვიერთდით და ერთად გავაგონოთ ჩვენი ხმა რეგიონიდანაც", - წერენ აქციის ორგანიზატორები.

როგორც ისინი ამბობენ, მყარ პოზიციაზე დგანან და მოუწოდებენ სხვა სტუდენტებსა და სკოლის უფროსკლასელებს, შეუერთდნენ პროტესტს.

შეგახსენებთ, ზსსუ-ს სტუდენტებმა 13 მაისს ფიცი დადეს იგივე ლოკაციაზე და თქვეს, რომ დაიცავენ ქვეყნის ევროპულ გზასა და საქართველოს ტერიტორიულ მთლიანობას.

პარლამენტმა "უცხოური გავლენის გამჭვირვალობის შესახებ" კანონპროექტი მესამე მოსმენით გუშინ მიიღო. მას მხარი 84-მა დეპუტატმა დაუჭირა, 30 კი წინააღმდეგი იყო.

კანონის მხარდამჭერებს შორის ზუგდიდელი, ხობელი და ფოთელი პარლამენტარებიც იყვნენ.

საკანონმდებლო ორგანოში კანონპროექტის განხილვა ხმაურისა და ფიზიკური დაპირისპირების ფონზე მიმდინარეობდა. ქვეყანაში რამდენიმე კვირაა პერმანენტულად მიმდინარეობს საპროტესტო აქციები.


ამავე თემაზე: 

ზუგდიდში „აგენტების“ კანონის მესამე მოსმენით დამტკიცებას აპროტესტებენ (ფოტო)

ქვარაია, თოლორაია, ბერაია, ხახუბია - "აგენტების კანონის" მხარდამჭერები სამეგრელოდან

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)

რადიო "ათინათი" სხვა მედიებთან ერთად ე.წ აგენტების კანონის პარლამენტში წარდგენას აპროტესტებს

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)