აფხაზეთის თვითგამოცხადებული რესპუბლიკის პარლამენტის ე.წ. დეპუტატებმა „მოქალაქეობის შესახებ“ კანონში ცვლილებები პირველი მოსმენით შეიტანეს.

აფხაზი დეპუტატის დიმიტრი მარშანიას განცხადებით, არსებობს „გადაუდებელი აუცილებლობა“ უფრო მარტივი და გამჭვირვალე გახდეს იმ პირთა აღრიცხვის საკითხების მოწესრიგება, რომლებმაც მიიღეს ან აღიდგინეს „ აფხაზეთის რესპუბლიკის მოქალაქეობა“, – განაცხადა დეპუტატმა დიმიტრი მარშანიამ კანონპროექტის წარდგენისას.

„აფსნიპრესის“ თანახმად, „უცხო ქვეყნის მოქალაქეებისთვის და მოქალაქეობის არმქონე პირებისთვის, რომელთაც ზოგადი წესით სურთ „აფხაზეთის მოქალაქეობის“ მიღება, „კანონპროექტი ითვალისწინებს ბინადრობის ვადის გაზრდას ბინადრობის ნებართვის მიღების დღიდან მოქალაქეობის მოთხოვნის დღემდე უწყვეტად 25 წლამდე ან აღნიშნული პირები 1999 წლის 12 ოქტომბრიდან უწყვეტად ათი წლის განმავლობაში უნდა ცხოვრობდნენ აფხაზეთის ტერიტორიაზე“.

ამავე ცნობით, დოკუმენტი ითვალისწინებს“ მოქალაქეობის“ მინიჭების პროცედურას იმ პირებისთვის, რომლებიც არიან ჩერქეზების (ადიღეების) შთამომავლები. „კანონპროექტი“ ასევე ადგენს „მოქალაქეობაზე“ გამარტივებული წესით მიღების კვოტას - წელიწადში არაუმეტეს 30 ადამიანისა „აფხაზეთისა და კაცობრიობის მიმართ განსაკუთრებული დამსახურების მქონე, ან აფხაზეთისთვის დაინტერესებული პროფესიის ან კვალიფიკაციის მქონე პირებისთვის“.

აქვე განმარტებულია, რომ გაფართოვდა „მოქალაქეობის მიღებისა და მოქალაქეობის აღდგენის თაობაზე განაცხადების უარყოფის საფუძვლების ნუსხა“ . კერძოდ, კი, ეს ეხება იმ პირების (მათ შორის მათი ოჯახის წევრების და ნათესავების) მიერ წარდგენილ განცხადებებს, რომლებმაც „დაგეგმეს, მოამზადეს, წამოიწყეს ომი აფხაზეთის წინააღმდეგ, ასევე იყვნენ შეიარაღებული ფორმირებების (ნაწილების), სამხედრო პოლიციის, ძალოვანი სტრუქტურების და საქართველოს სხვა სტრუქტურების წევრები აფხაზეთის რესპუბლიკის ოკუპაციის დროს, 1992 წლის 14 აგვისტოდან 1993 წლის 30 სექტემბრამდე პერიოდში ან სხვა სახის დახმარება გაუწიეს საქართველოს საოკუპაციო რეჟიმს მითითებულ პერიოდში, მონაწილეობა მიიღეს საომარ მოქმედებებში, აფხაზეთის წინააღმდეგ მიმართულ სპეციალურ სამხედრო ოპერაციებში, მიიღეს რესპუბლიკაში შესვლის აკრძალვა დებულების შესაბამისად“.

გამოცემა წერს, რომ „კანონპროექტის“ მიხედვით, ინერგება იმ პირთა პირადი აღრიცხვის სახელმწიფო რეესტრი, რომლებმაც მიიღეს „აფხაზეთის მოქალაქეობა“. „მოქალაქეობის საკითხებზე პრეზიდენტის განკარგულებებისა და ბრძანებების გამოქვეყნება სავალდებულო გახდება“.

უფრო ადრე, ცნობილი გახდა, რომ გალის მცხოვრებლები „ბინადრობის მოწმობის“ მიღებას 5 - ის ნაცვლად, 10 წლის ვადით შეძლებენ. შესაბამისი ცვლილებები „აფხაზეთის რესპუბლიკაში უცხო ქვეყნის მოქალაქეების სამართლებრივი მდგომარეობის შესახებ“ ე.წ. კანონში დე ფაქტო რესპუბლიკის „პარლამენტმა“ 2023 წლის დეკემბერში მიიღო.