ამერიკის შეერთებულ შტატებში, პენსილვანიის ქალაქ ალენთაუნში "CNY Arm Wrestlers"-ის მკლავჭიდის ჩემპიონატის გამარჯვებული მესტიის მუნიციპალიტეტის სოფელ მულახიდან კესო იოსელიანი გახდა.

ის, ორივე ხელით, 80 კგ წონით კატეგორიაში ასპარეზობდა და ჩემპიონის ტიტულის გარდა, კიდევ 4 პრიზი მოიპოვა.

იოსელიანი რადიო "ათინათს" ეუბნება, რომ ამ სპორტით დაინტერესდა, როდესაც მისი ოჯახის წევრის თამაშს დაესწრო და პრაქტიკული გამოცდილების სიმწირის მიუხედავად, არ შეუშინდა აშშ-ის ტურნირში მონაწილეობის მიღებას.

"საქართველოში ჩემი უმცროსი და არის დაკავებული ამ სპორტით. ცოტახნით ადრე, სანამ ამერიკაში წამოვიდოდი მის რამდენიმე ვარჯიშს დავესწარი და მეც დავინტერესდი. შემდეგ უკვე ამერიკაში მომიწია მალევე წამოსვლა და გადავწყვიტე, პირდაპირ შეჯიბრში მიმეღო მონაწილეობა. არ მივარჯიშია, არც ტექნიკა ვიცი. მიღებული შედეგის ფონზე ვაპირებ დავიწყო მკლავჭიდში ვარჯიში, ავიყვანო მწვრთნელი და აღნიშნული სპორტის სახეობა ვაქციო ჩემი ცხოვრების წესად", -თქვა მან.

ის ამბობს, რომ სურს საკუთარი საქმით საქართველოს წარმატებაში წვლილი შეიტანოს.