საქართველოს უსაფრთხოების სამსახური გალის რაიონის სოფელ ოტობაიაში საოკუპაციო რეჟიმის წარმომადგენლების მიერ საქართველოს ორი მოქალაქის დაკავებასთან დაკავშირებით განცხადებას ავრცელებს და აღნიშნულ ფაქტს უკანონოს უწოდებს.

მათივე ცნობით, უწყებამ ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს ინფორმაცია უკვე მიაწოდა.

"საოკუპაციო რეჟიმის წარმომადგენლებმა, საქართველოში ევროკავშირის სადამკვირვებლო მისიის (EUMM) მიერ ოპერირებული ცხელი ხაზის მეშვეობით, დაადასტურეს უკანონო დაკავების ფაქტი და განაცხადეს, რომ ე.წ. "სისხლის სამართლის საქმე" აღძრულია "უკანონო მიგრაციის ორგანიზების" ე.წ. "ბრალდებით", უკანონოდ დაკავებულ ორივე პირს, ე.წ. "სასამართლოს" მიერ "მიესაჯა" 2 თვიანი "წინასწარი პატიმრობა" და ამჟამად იმყოფებიან ე.წ "აფხაზეთის სახელმწიფო უშიშროების სამსახურის იზოლატორში".

უკანონო დაკავების ფაქტთან დაკავშირებით, საქართველოს სახელმწიფო უსაფრთხოების სამსახურმა მოახდინა ჟენევის საერთაშორისო დისკუსიების თანათავმჯდომარეებისა და საერთაშორისო პარტნიორების ინფორმირება. ამოქმედებულია ყველა არსებული მექანიზმი და აქტიურად მიმდინარეობს მუშაობა აღნიშნული პირების დაუყოვნებლივ გათავისუფლების მიზნით.

საოკუპაციო რეჟიმის მიერ განხორციელებული უკანონო დაკავებები ართულებს ადგილობრივი მოსახლეობის ყოველდღიურ ცხოვრებას და უკიდურესად აზიანებს უსაფრთხოების გარემოს. აღნიშნულიდან გამომდინარე მნიშვნელოვანია უკანონოდ დაკავებული პირის უპირობო გათავისუფლება", - განმარტავს სუს-ი.

მათივე განცხადებით, საქართველოს მოქალაქეების მიმართ, საოკუპაციო რეჟიმის მხრიდან განხორციელებულ ძალადობრივ და უკანონო ქმედებებთან დაკავშირებით, საერთაშორისო თანამეგობრობამ არაერთგზის დააფიქსირა კონსოლიდირებული პოზიცია და დაგმო დანაშაულებრივი პრაქტიკა, რაც მიზანმიმართულად მკვიდრდება საქართველოს ოკუპირებულ ტერიტორიებზე. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას.

აფხაზეთის დე ფაქტო სუს - ის ინფორმაციით, გალის რაიონის სოფელ (ბღოურაში) მეორე ოტობაიაში "აფხაზეთის ბინადრობის ნებართვის მქონე", საქართველოს ორი მოქალაქე, რემიკო (50 წლის) და მურთაზ (57 წლის) ჭითანავები დააკავეს. მათი თქმით, ამით არალეგალური მიგრაციის არხის ჩაახშეს. ისინი ამტკიცებენ, რომ დაკავებულთა მფლობელობაში არსებულ სახლებში აღმოჩენილია F1 ხელყუმბარა, ხელყუმბარა, ргд 5, ტროტილი 1600 გ პლასტიდი - 45 გ, სხვადასხვა კალიბრის ვაზნები, ასევე დოლარის კუპიურების დასტა.

შეგახსენებთ, ოკუპირებულ აფხაზეთში უკანონო პატიმრობაშია საქართველოს კიდევ ორი მოქალაქე: ქრისტინე თაკალანძე, მას ბრალად ედება "ჯაშუშობა" და ე.წ. უზენაესმა სასამართლომ 10 წლითა და 6 თვით თავისუფლების აღკვეთა 2023 წლის 5 მაისს მიუსაჯა; ირაკლი ბებუა, რომელსაც დე ფაქტო სასამართლომ "სახელმწიფო სიმბოლიკის შეურაცხყოფის", "სხვისი ქონების განზრახ დაზიანების" და "საბრძოლო მასალის უკანონოდ შენახვის" ბრალდებით 2020 წლის 7 დეკემბერს 9 წლით თავისუფლების აღკვეთა მიუსაჯა.


ამავე თემაზე: 

გალის რაიონში ოკუპირებული აფხაზეთის ე.წ. სუს-მა საქართველოს ორი მოქალაქე დააკავა

აფხაზეთში ქრისტინა თაკალანძეს 10 წლით და 6 თვით თავისუფლების აღკვეთა მიესაჯა

გალში დაკავებულ ქრისტინე თაკალანძეს სოხუმის სასამართლომ პატიმრობის ვადა გაუხანგრძლივა

"ჯაშუშობის" ბრალდებით აფხაზეთში საქართველოს მოქალაქე დააკავეს

ჟენევის მოლაპარაკებების 51-ე რაუნდზე ირაკლი ბებუას საქმე განიხილეს - სახელმწიფო მინისტრის აპარატი

"აფხაზური" დროშის დაწვისთვის დაკავებულ ირაკლი ბებუას 9 წლიანი პატიმრობა მიესაჯა

ოკუპირებულ აფხაზეთში დაკავებული ირაკლი ბებუას ჯანმრთლობის მდგომარეობა დამძიმდა - სოციალური სამართლიანობის ცენტრი