აფხაზეთის დე ფაქტო რესპუბლიკის ე.წ. პრეზიდენტი აფხაზებს ურჩევს, არ აიღონ საქართველოს ხელისუფლების მიერ შემოღებული „ნეიტრალური პასპორტები“ .
ამის შესახებ ასლან ბჟანიამ ადგილობრივი ტელევიზიისთვის მიცემულ ინტერვუში, 19 სექტემბერს განცახადა.

მისი თქმით, „ძალიან გააკვირვა" ე.წ. „პარლამენტის" ყოფილი დეპუტატის, ლეონიდ ჩამაგუას განცხადებამ, რომ აფხაზებმა „ნეიტრალური პასპორტებით“ უნდა ისარგებლონ.

გავრცელებული ინფორმაციით, მოსკოვმა შესაძლოა „აპარტამენტების“ კანონპროექტის მოწინააღმდეგე აფხაზ „დეპუტატებს“ და სამოქალაქო საზოგადოების წარმომადგენლებს რუსეთის მოქალაქეობა ჩამოართვას, ამ ფონზე, ჩამაგუასთვის გაუგებარია, რატომ არ უნდა გამოიყენონ „გაეროს მიერ შეთავაზებული“ ეს პასპორტები, იმ შემთხვევაში, თუ ადამიანს მძიმედ დაავადებული ნათესავი ჰყავს და სასიცოცხლოდ მნიშვნელოვანია საზღვარგარეთ სამკურნალოდ გამგზავრება.

აფხაზი ლიდერის განმარტებთ, ეს „პირობითად ნეიტრალური პასპორტებია“, იდეა საქართველოს ხელისუფლებას ეკუთვნის და წარმოადგენს თბილისის მიერ „ოკუპირებულად წოდებული" აფხაზეთის რეინტეგრაციის პროგრამის ნაწილს.
„მე არავის ვურჩევ ნეიტრალური პასპორტების აღებას. ჩვენ გვაქვს ჩვენი, აფხაზური პასპორტები. გვაქვს ჩვენი მოკავშირის(რუსეთის) პასპორტები და ეს სრულიად საკმარისია“, - განაცხადა ბჟანიამ.

ოკუპირებული აფხაზეთის და ცხინვალის რეგიონის მცხოვრებლებს საქართველოს ხელისუფლების მიერ კონტროლირებულ ტერიტორიაზე მდებარე იუსტიციის სახლებში შეუძლიათ აიღონ ჰუმანიტარული ხასიათის ორი საბუთი - პირადობის ნეიტრალური მოწმობა და ნეიტრალური სამგზავრო დოკუმენტი. მოწმობით შესაძლებელია სოციალური მომსახურების უფასოდ მიღება, ნეიტრალური დოკუმენტით კი - საზღვარგარეთ გამგზავრება.

ინფორმაციისთვის, 1 სექტემბრიდან მოსკოვმა სოხუმს დაფინანსება შეუჩერა. მიზეზად მოსკოვი აფხაზეთის ე.წ. მთავრობის მიერ გარკვეული ვალდებულებების შეუსრულებლობას ასახელებს. გარდა ამისა, მოსკოვი აპირებს მოუწოდოს სახელმწიფო სათათბიროს და ფედერაციის საბჭოს, მინიმუმამდე დაიყვანონ კონტაქტები „აფხაზეთის პარლამენტის დეპუტატებთან რუსეთის წინაშე ვალდებულებების შესრულების არაკონსტრუქციული პოზიციის გამო“.