აფხაზეთის დე ფაქტო რესპუბლიკის ე.წ. პრეზიდენტობის კანდიდატებმა ბადრა გუნბამ და ადგურ არძინბამ არჩევნების მეორე ტურის წინ შეთანხმებას მოაწერეს ხელი.
დოკუმენტის თანახმად, მათ პირობა დადეს, რომ არ გამოიყენონ შავი პიარი, ადმინისტრაციული რესურსები და არ დაუშვან მოწოდებები ძალადობრივი ქმედებებისკენ. მათ ხაზგასმით აღნიშნეს, რომ „მზად არიან მიიღონ არჩევნების მეორე ტურის შედეგები, თუ ის ჩატარდება კანონმდებლობის შესაბამისად“.

დოკუმენტში აღნიშნულია, რომ „აფხაზურ საზოგადოებაში არსებობს ურყევი კონსენსუსი აფხაზეთის სუვერენიტეტისა და რუსეთთან თანაბარი და მოკავშირე ურთიერთობების შემდგომი განმტკიცების შესახებ და არც ერთი საპრეზიდენტო კანდიდატი არ არის რომელიმე მესამე ძალის მხარდამჭერი ან წარმომადგენელი“.

გარდა ამისა, მათ დაადასტურეს თავიანთი „ერთგულება 2024 წლის 19 ნოემბრის შეთანხმების მიმართ და გააგრძელეს მისი მოქმედება 2025 წლის 2 მარტამდე“. 

აღსანიშნავია, რომ სოხუმში „საარჩევნო კამპანიის“ დროს რამდენიმე ინციდენტი მოხდა. კერძოდ, „პრეზიდენტის“ მოვალეობის შემსრულებელმა, ვალერი ბგანბამ საკადრო ცვლილებები განახორციელა, რაც ბადრა გუნბას გუნდმა გასული წლის ნოემბერში დადებული ხელშეკრულებების დარღვევად მიიჩნია.

„ეხო კავკაზას“ თანახმად, მანამდე, რუსეთის საგამოძიებო კომიტეტმა აღძრა სისხლის სამართლის საქმე „აფხაზეთში მცხოვრები სხვადასხვა ეროვნების რუსეთის მოქალაქეების მიმართ სიძულვილისა და მტრობის გაღვივების ფაქტზე“.

განცხადებაში ნათქვამია, რომ „გარკვეული პირები, რომლებიც იყენებენ ინტერნეტს“, საჯაროდ მოუწოდებდნენ „მათ შორის სომხური ერის წარმომადგენლების მიმართ ძალადობისკენ “.

ოკუპირებულ აფხაზეთში „საპრეზიდენტო“ არჩევნების მეორე ტურში, რომელიც 1 მარტს გაიმართება, მონაწილეობას ორი კანდიდატი მიიღებს, ასლან ბჟანიას თანაგუნდელი - ბადრა გუნბა და აფხაზი ოპოზიციონერი, ადგურ არძინბა.

ვადამდელი „საპრეზიდენტო“ არჩევნები, აფხაზეთში, 15 თებერვალს გაიმართა.

ცნობისთვის, ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა.