სოხუმის აეროპორტთან დაკავშირებით მოსალოდნელ სკანდალზე წერს ინფორმაციული სააგენტო „აიაშარა“. გამოცემის ცნობით, სარემონტო და სამშენებლო სამუშაოების შესასრულებლად დაქირავებული სამშენებლო კომპანიების თანამშრომლები გაიფიცნენ. ამავე ცნობით, 15 მაისის შემდეგ, 8 - მდე სამშენებლო კომპანიის არც ერთი თანამშრომელი არ გამოსულა სამსახურში. მიზეზად, ხელფასის გადაუხდელობა სახელდება.

გამოცემის ცნობით, გენერალური კონტრაქტორი ხელფასს არ იხდის იმის გამო, რომ აეროპორტის მფლობელს დაახლოებით 2 თვეა თანხა არ გადაურიცხავს. „აიაშარას“ წყაროს ცნობით, სამშენებლო კომპანიების თანამშრომლები უარს ამბობენ სამსახურში წასვლაზე მანამ, სანამ ყველა სახელფასო დავალიანებას არ დაუფარავენ.

ამავე წყაროს ინფორმაციით, რამდენიმე დღის წინ, აეროპორტში არასტაბილური ენერგომომარაგების გამო, საგანგებო სიტუაცია შეიქმნა - სადისპეჩეროში, სადაც ფრენის მართვასა და თვითმფრინავების უსაფრთხო გადაადგილებაზე პასუხისმგებელი პირები იმყოფებიან, ელექტროენერგიის მიწოდება მთლიანად გაითიშა, ხოლო ასაფრენ ბილიკებზე გამოყენებული სასიგნალო და განათების მოწყობილობების სისტემა გამოირთო. მეორე დღეს, ავარიის მიზეზები აღმოიფხვრა, თუმცა, პრობლემის გადასაჭრელად, მაღალი კლასის აღჭურვილობაა საჭირო“, წერს გამოცემა წყაროზე დაყრდნობით.

პოსტის ავტორები შეახსენებენ მკითხველებს, რომ სოხუმის აეროპორტის განახლების პროექტს ოკუპირებული აფხაზეთის ე.წ. პრეზიდენტი ბადრა გუნბა კურირებდა, როდესაც ის ჯერ კიდევ „ვიცე-პრეზიდენტი“ იყო.

„მან ამ პროექტის წარმატების დემონსტრირება წინასაარჩევნო პერიოდშიც განაგრძო, პომპეზური სატესტო ფრენისა და აეროპორტის გახსნის წინასაარჩევნო შოუს სახით გამოყენებით. ამასობაში, ჩვენი წყარო იტყობინება, რომ ყველა გამოცხადებულმა ავიაკომპანიამ უარი თქვა აეროპორტში ფრენაზე, ძირითადად ტექნიკური მიზეზების გამო. სამწუხაროდ, ბადრა გუნბა დუმს ყველა ამ პრობლემის შესახებ, რაც საფრთხეს უქმნის ობიექტის შემდგომ ფუნქციონირებას, რათა პრობლემები არ შეუქმნას მოიჯარეებსა და მმართველ კომპანიას”, - წერს „აიაშარა“.

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

13 მაისს, სოხუმის აეროპორტში ნიჟნი ნოვგოროდიდან შესრულდა პირველი ფრენა.

მანამდე, 1 მაისს,
ოკუპირებულ აფხაზეთში პირველ რეისი ვნუკოვოს აეროპორტიდან ავიაკომპანია UVT Aero - მ შეასრულა.

ცნობისთვის, 7 თებერვალს სოხუმის აეროპორტმა პირველი სატესტო რეისი მიიღო მოსკოვიდან, რომელიც ავიაკომპანია „UVT Aero“-მ განახორციელა.

სოხუმიდან 18 კილომეტრში მდებარე აეროპორტი, რომელიც 1950-იან წლებში ააშენეს, 1990-იანი წლების საომარი მოქმედებების და აფხაზეთზე საქართველოს ცენტრალური ხელისუფლების მიერ კონტროლის დაკარგვის შემდეგ, 1993 წელს დაიხურა.
საქართველოს ხელისუფლების გადაწყვეტილების საფუძველზე, სამოქალაქო ავიაციის საერთაშორისო ორგანიზაციას სოხუმის აეროპორტის კოდი ანულირებული აქვს.

მედიაში გამოქვეყნებული, საქართველოს სამოქალაქო ავიაციის სააგენტოს განცხადებით, სოხუმის აეროპორტის ოპერირება უკანონოა და ავიაკომპანია, რომელიც შეასრულებს რეისებს, „დაარღვევს საერთაშორისო სამოქალაქო ავიაციის შესახებ ჩიკაგოს კონვენციის ფუნდამენტურ და ძირითად პრინციპებს“.

თბილისი აცხადებს, რომ საქართველო სარგებლობს სამოქალაქო ავიაციის საერთაშორისო ორგანიზაციის (ICAO) „უპირობო მხარდაჭერით“.

2019 წლის ივლისში ოკუპირებული აფხაზეთის ე.წ. მთავრობამ მიიღო დადგენილება სოხუმის აეროპორტისთვის "ერთობლივი აეროდრომის" სტატუსის მინიჭების და ასო-კოდის მინიჭების შესახებ. ამ დოკუმენტის შესაბამისად, აფხაზეთის საჰაერო სივრცეს მიენიჭა ოთხასოიანი კოდი "URAS" რუსეთის ფედერაციის საავიაციო ინფორმაციის კრებულში (AIP) შემდგომ შესატანად.

2006 წელს სამოქალაქო ავიაციის საერთაშორისო ორგანიზაცია ICAO - მ გააუქმა სოხუმის აეროპორტის კოდი და დოკუმენტებიდან ამოიღო ინფორმაცია ამის შესახებ.