78 წლის ციალა ჯოჯუასთან, რომელიც დღეს დილიდან ზუგდიდის მუნიციპალიტეტის გამგეობის შენობის წინ წევს და შიმშილობს, სახალხო დამცველის ზუგდიდის ოფისის წარმომადგენლები მივიდნენ და ვითარებას ადგილზე გაეცნენ. სახალხო დამცველის წარმომადგენლის ბაგრატ ქირიას განმარტებით, მათი უწყება მოხუცის პრობლემას შეისწავლის. შეგახსენებთ, რომ 78 წლის ციალა ჯოჯუამ ზუგდიდის გამგეობის შემობის წინ უვადო შიმშილობა დღეს დილიდან გამოაცხადა. ის ადგილობრივი ხელისუფლებისგან საკუთარი ბინის დაბრუნებაში დახმარებას ითხოვს, რომელიც, მისი მტკიცებით, ბინის ამხანაგობის თავმჯდომარემ ციცო მამარდაშვილმა და გამგეობის აიპ დასუფთავების სამსახურის თანამშრომელმა ზურაბ ალანიამ თაღლითური გზით წაართვეს. „თუ ადგილობრივი ხელისუფლება დახმარებას არ გაგვიწევს, ჩვენ თბილისში პროკურატურის ან სხვა სახელმწიფო უწყების შენობასთან გადავინაცვლებთ“, - უთხრა რადიო „ათინათს“ ლალი ცირდავამ. ჯოჯუას და ცირდავას ბრალდებებს ერთ-ერთი ადრესატი, გამგეობის აიპ დასუფთავების სამსახურის თანამშრომელი ზურაბ ალანია გამოეხმაურა, რომელის ამტკიცებს, რომ აღნიშნულ ოჯახს კუთვნილი ფართი მიღებული აქვს და მათი მოთხოვნა უსაფუძვლოა.