„არა რუსულ კანონს! კი ევროპას!“ , - ზუგდიდში „აგენტების კანონის“ საწინააღმდეგო აქცია

„არა რუსულ კანონს! კი ევროპას!“ , - ზუგდიდში „აგენტების კანონის“ საწინააღმდეგო აქცია - მსვლელობა მიმდინარეობს (ფოტო)

19:27 / 29.04.2024

ზუგდიდის მუნიციპალიტეტის მერიის წინ „აგენტების კანონის“ საწინააღმდეგო აქცია გაიმართა, სლოგანით: „არა რუსულ კანონს! კი ევროპას!“

აქციის ორგანიზატორები და მონაწილეები აცხადებენ, რომ კიდევ ერთხელ გამოვიდნენ, რათა გააპროტესტონ "უცხოური გავლენის გამჭვირვალობის შესახებ" კანონპროექტის პირველი მოსმენით მიღება და კიდევ ერთხელ უჩვენონ ხელისუფლებას, რომ არ ეგუებიან ქვეყნის რუსეთისკენ სვლას".

„არის დრო, როდესაც დუმილი ბოროტების მხარეს დგომას ნიშნავს. ასეთი დროა აქ და ახლა. როდესაც ხელისუფლება ცდილობს ქვეყანა რუსეთისკენ წაიყვანოს. ერთის მხრივ რუსული კანონით ცდილობს ჩამოიშოროს ყველა, ვინც მის ქვეყნისთვის მტრულ ინტერესებს ეწინააღმდეგება, მეორეს მხრივ კი ცდილობს, ოფშორების კანონით სასათბურე პირობები შექმნას უკონტროლო ფინანსების შემოდინებისა და შავი ფულის გათეთრებისთვის - ჩვენ გვრჩება ერთადერთი გზა, გამოვიდეთ და ხმამაღლა ვთქვათ - არა რუსულ კანონს!“, - ამბობენ ისინი.

აქციას შეუერთდა რუსეთის მოქალაქე ევგენია პეტროვაც. მისი თქმით, ის თავის დროზე არ შეუერთდა მსგავს პროტესტებს, ისევე როგორც მისი თანამოქალაქეების უმრავლესობა, რის გამოც, ბევრ მათგანს, პუტინის რეჟიმისგან თავის დაღწევა და რუსეთის დატოვება მოუხდა.

„ვთვლი, რომ აქ უნდა ვიყო, იმისათვის, რომ პირადად ვინმეს ან მედიასაშუალებებს ვუთხრა, აუცილებელია გამოსვლა. ჯერ გგონია: „ეს ჩემი საქმე არ არის, ვიღაც სხვა გამოვა, მე რისი შეცვლა შემიძლია“. შედეგები კი კატასტროფული შეიძლება მოჰყვეს ამას. სანამ ჯერ კიდევ არის შესაძლებლობა, სანამ ჯერ კიდევ არ გირტყამენ ხელკეტებს, ხელებს არ გიგრეხენ და პოლიციის მანქანებში არ გსვამენ, უნდა გამოხვიდეთ და თქვათ, რასაც ფიქრობთ“, - ამბობს ახლაგაზრდა ქალი.

აქცია ზუგდიდში მსვლელობით გაგრძელდა. ის სამოქალაქო სოლიდარობის ფონდის ორგანიზებით იმართება.