დღეს, 7 თებერვალს, სოხუმის აეროპორტი მოსკოვიდან პირველ სატესტო რეისს მიიღებს. ამის შესახებ „რია ნოვოსტის“ რუსეთის ტრანსპორტის მინისტრმა რომან სტაროვოიტმა, აფხაზეთის თვითგამოცხადებული რესპუბლიკის პრეზიდენტობის კანდიდატთან , ბადრა გუნბასთან შეხვედრაზე განაცხადა.

ამავე ცნობით, ეს უკანასკნელი, აეროპორტის რეკონსტრუქციისა და მშენებლობის საკოორდინაციო შტაბს ხელმძღვანელობდა.

„მოველით, რომ 2025 წლის ტურისტული სეზონის წინ გავხსნით რეგულარულ ავიარეისებს. ჩვენთვის ძალიან მნიშვნელოვანია სატრანსპორტო კავშირი მეზობელ აფხაზეთთან“, - თქვა სტაროვოიტმა.

მისივე თქმით, რუსულმა "ЮВТ Аэро" - მ და სულ მცირე კიდევ ორმა კომპანიამ გამოთქვეს ინტერესი ამ მარშრუტის მიმართ. 

თავის მხრივ, გუნბამ "აფხაზი ხალხისთვის ამ პროექტს მნიშვნელობაზე" ისაუბრა.

„დღეს ჩვენ გვაქვს ერთი საგუშაგო მდინარე ფსოუზე, რომელიც რუსეთის და აფხაზეთის მოქალაქეებს გადაადგილების საშუალებას აძლევს. რა თქმა უნდა, ამ ურთიერთობების განვითარებას განსაკუთრებულ ბიძგს მისცემს ქალაქ სოხუმის საერთაშორისო აეროპორტის გახსნა. ეს არის რესპუბლიკის ეკონომიკური პოტენციალისა და შესაძლებლობების გაუმჯობესება. ჩვენ დიდი ხანია ველოდებით ამ საკითხის გადაწყვეტას“, - განაცხადა მან.

3 თებერვალს ოკუპირებული აფხაზეთის ახალმა რუსმა კურატორმა, რუსეთის პრეზიდენტის ადმინისტრაციის აპარატის უფროსის პირველმა მოადგილემ სერგეი კირიენკომ განაცხადა, რომ „სოხუმი აეროპორტი დამატებით შესაძლებლობებს გაუხსნის როგორც აფხაზეთის მოქალაქეებს, ასევე რუს ტურისტებს“. მისი თქმით, ინვესტორები უკვე ფიქრობენ სამომავლოდ მის გაფართოებაზე. მისივე თქმით, სატესტო რეისი რუსეთიდან უკვე თებერვალში უნდა შესრულდეს, ხოლო რეგულარური ფრენები, მაისში, ტურისტული სეზონისთვის დაიწყება. 

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

2019 წლის ივლისში ოკუპირებული აფხაზეთის ე.წ. მთავრობამ მიიღო დადგენილება სოხუმის აეროპორტისთვის "ერთობლივი აეროდრომის" სტატუსის მინიჭების და ასო-კოდის მინიჭების შესახებ. ამ დოკუმენტის შესაბამისად, აფხაზეთის საჰაერო სივრცეს მიენიჭა ოთხასოიანი კოდი "URAS" რუსეთის ფედერაციის საავიაციო ინფორმაციის კრებულში (AIP) შემდგომ შესატანად.

საქართველოს სამოქალაქო საავიაციო სააგენტო მაშინ განცხადებით გამოეხმაურა ოკუპირებული აფხაზეთის მთავრობის გადაწყვეტილებას სოხუმის აეროპორტის აღდგენის შესახებ. გავრცელებულ განცხადებაში აღნიშნულია, რომ საქართველოს ნებართვის გარეშე, სოხუმის აეროპორტში საერთაშორისო საჰაერო მიმოსვლა ვერ განხორციელდება.

2006 წელს სამოქალაქო ავიაციის საერთაშორისო ორგანიზაცია ICAO - მ გააუქმა სოხუმის აეროპორტის კოდი და დოკუმენტებიდან ამოიღო ინფორმაცია ამის შესახებ.

ICAO-ს არ აქვს სოხუმის აეროპორტისთვის მინიჭებული ადგილმდებარეობის განმსაზღვრელი ოთხნიშნა კოდი. აღნიშნული კოდის მინიჭება მხოლოდ უფლებამოსილი საავიაციო ხელისუფლების შუამდგომლობის საფუძველზე ხდება.

შეგახსენებთ, საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.