ზუგდიდს, ევროკავშირის ფინანსური მხარდაჭერით, მალე კულტურის განვითარების სტრატეგიული დოკუმენტი ექნება. კულტურის განვითარების სტრატეგიის შემუშავების პროცესის პრეზენტაცია, დღეს ტექნოპარკში გაიმართა. ღონისძიებას ზუგდიდის მუნიციპალიტეტის მერი მამუკა წოწერია, EU4Culture პროექტის გუნდის ხელმძღვანელი ანატოლი ბაიფერტი, ექსპერტი/კონსულტანტი ლევან ხარატიშვილი და სამოქალაქო სექტორის წარმომადგენლები ესწრებოდნენ.

მამუკა წოწერიამ ევროკავშირს ფინანსური მხარდაჭერისთვის მადლობა გადაუხადა და აღნიშნა, რომ ზუგდიდისთვის ძალიან მნიშვნელოვანია კულტურის განვითარების სტრატეგიული დოკუმენტის არსებობა.

"პირველად ზუგდიდის მუნიციპალიტეტისთვის იქმნება კულტურის განვითარების სტრატეგიული დოკუმენტი, რაც ძალიან მნიშვნელოვანი ფაქტია, ვინაიდან განისაზღვრება ძირითადი პრიორიტეტები და მიზნები კულტურული ცხოვრების განვითარებისთვის. ზუგდიდის მუნიციპალიტეტი ამ დოკუმენტის შექმნის შემდეგ გახდება უფრო მიზანმიმართული, გეგმაზომიერი და შედეგზე ორიენტირებული. რა თქმა უნდა ეს იქნება უნიკალური, რომელიც გაითვალისწინებს ზუგდიდის კონტექსტს, ჩვენ უნდა შევიმუშაოთ ჩვენი სტრუქტურა სტრატეგიის, ასევე გამოვავლინოთ ის გამოწვევები, რომელიც აქტუალურია მუნიციპალიტეტისთვის და დავსახოთ ამ გამოწვევებისათვის საპასუხო ადეკვატური ღონისძიებები. მე მადლობა მინდა გადავუხადო ევროკავშირს, რომლის აპლიკანტი გავხდით ზუგდიდის მუნიციპალიტეტი, ვიყავით შერჩეული და გადმოგვეცა საგრანტო დაფინანსება 30 000 ევროს ფარგლებში, სწორედ ამ დოკუმენტის შექმნის მიზნით", - აღნიშნა მამუკა წოწერიამ.

მერის თქმით დოკუმენტის შემუშავების პროცესში მთავარი და აუცილებელია საზოგადოების ჩართულობა, რათა პროცესი იყოს გამჭვირვალე და მივიღოთ ისეთი დოკუმენტი, რომელიც ასახავს ზუგდიდის რეალობას. ევროკავშირის მხარდაჭერით, კულტურის განვითარების სტრატეგიას, ზუგდიდის გარდა ფოთი და ქუთაისი შეიმუშავებენ.

ევროკავშირის პროექტ EU4Culture-ს კონკურსის ფარგლებში ზუგდიდმა, ფოთმა და ქუთაისმა კულტურის განვითარების სტრატეგიების მოსამზადებლად 30,000 ევრომდე დაფინანსება მიიღო.