საჯარო სამსახურის  ბიუროს მიერ ქონებრივი დეკლარაციების უარყოფითად შეფასების შემდეგ დაჯარიმებულ თანამდებობის პირთა და საჯარო მოხელეთა შორის ქალაქ ზუგდიდის მაჟორიტარი დეპუტატი მერაბ ქვარაია, წალენჯიხის მერი ბესიკ ფარცვანია და უგდიდის მერიის ეკონომიკური პოლიტიკისა და მუნიციპალური სერვისების მართვის სამსახურის უფროსი თენგიზ ქობალია მოხვდნენ. ისინი 1000-1000 ლარით დაჯარიმდნენ.




ჯარიმა უკვე გადაიხადა ზუგდიდის მაჟორიტარმა დეპუტატმა მერაბ ქვარაიამ. მისი თქმით, უარყოფითად შეფასებულ დეკლარაციებში ძირითადად ტექნიკური ხასიათის შეცდომებია და არა რამე სახის ქონების შეგნებულად გადამალვა. დეპუტატი ამბობს, რომ ამ კუთხით კანონმდებლობა დასახვეწია. ქვარაიამ განმარტა, რომ მის შემთხვევაში საუბარია 140 ლარზე, რომელიც მან ლექციის წაკითხვის შემდეგ ჰონორარის სახით მიიღო და შემოსავლებში აღნიშნული არ არის.

„არც მახსოვდა ამ თანხის შესახებ, როცა დეკლარაცია შევავსე. ასეთი სახის უზუსტობებია. მინდა გითხრათ, რომ ამ შემთხვევაში კანონში ხარვეზია ის, რომ არ ასხვავებს მცირე და მასობრივ გარღვევას. ამასთან, პრობლემაა ვადებთან დაკავშირებითაც, რადგან ხშირად ვერ ესწრება ინფორმაციის დაზუსტება, გადამოწმება და ასე შემდეგ. ჩვენ ვმუშაობთ ამ კუთხით, რომ ეს ლაფსუსები აღმოიფხვრას. კეთილსინდისიერი საჯარო მოხელისთვის 1000 ლარი საკმაოდ დიდი თანხაა“, - უთხრა რადიო „ათინათს“ ქვარაიამ.

1000 ლარიანი ჯარიმა გადაიხადა წალენჯიხის მერმა ბესიკ ფარცვანიამაც. როგორც მან ჩვენთან განმარტა, მისი დაჯარიმება დეკლარაციაში სახლის მფლობელების წილობრივი მონაცემების არასრულად შევსებამ გამოიწვია.

„საცხოვრებელი სახლის მფლობელების წილობრივი მონაცემები მქონდა შევსებული ჩემზე და დედაჩემზე, თუმცა არ მიმითითებია და-ძმა, რომელიც აქ არ ცხოვრობენ, მაგრამ ამ სახლში არიან ჩაწერილები“, - აღნიშნა ფარცვანიამ და დასძინა, რომ დეკლარაციას მომავალში უფრო ყურადღებით შეავსებს.

რაც შეეხება თენზიგ ქობალიას, ზუგდიდის მერიის ერთ-ერთი სამსახურის უფროსი ამბობს, რომ გარკვეული სხვაობა საბანკო ანგარიშებზე რეალურად არსებულ და დეკლარაციაში მითითებულ თანხებს შორის იყო.

„რა თქმა უნდა, შეგნებულად არასწორი ინფორმაცია არ ჩამიწერია. უბრალოდ, არც მახსოვდა, შეიძლება, ბარათიდან მოვხსენი რაღაც რაოდენობის თანხა და დამავიწყდა ან რამე მსგავსი“ - თქვა ქობალიამ.

2017 წელს საჯარო სამსახურის ბიურომ სულ 287 დეკლარაცია შეამოწმა, რომელთაგან უარყოფითად - 224, ხოლო დადებითად 56 დეკლარაცია შეფასდა.

ამ ეტაპზე უწყება მსგავს მონტორინგს ახორციელებს. შესამოწმებელ დეკლარაციებს შორის, „საერთაშორისო გამჭვირვალობა - საქართველოს“ მიერ მიწოდებული წერილობითი განცხადების საფუძველზე, ზუგდიდელი დეპუტატების დეკლარაციებიც მოხვდა. საჯარო სამსახურის ეროვნული ბიურო ედიშერი თოლორაიას, (ზუგდიდის მაჟორიტარი), ირაკლი ხახუბიას (ფოთის მაჟორიტარი), თენგიზ გუნავასა და ლაშა დამენიას („ევროპული საქართველოს“ წევრები) დეკლარაციებს ამოწმებს.

ამავე თემაზე:

უარყოფითად შეფასებულებში მერაბ ქვარაიას, ბესიკ ფარცვანიასა და თენგიზ ქობალის დეკლარაციები მოხვდა