რატომ დატოვა ენმ და რას აპირებს დეპუტატი, რომლის გამოც ზუგდიდის საკრებულოში ერთმანეთს სცემეს

19:08 / 23.03.2018

ფრაქცია „ევროპული საქართველოს“ თავმჯდომარის მოადგილემ გელა თოლორაიამ, რომლის მიზეზითაც გუშინ საკრებულოს სხდომათა დარბაზში დეპუტატები ერთმანეთს ფიზიკურად დაუპირისპირდნენ, ბრალდებებს პირველად რადიო „ათინათთან“ უპასუხა. ის კატეგორიულად უარყოფს ენმ-ის ზუგდიდის ორგანიზაციის თავმჯდომარის ანა წითლიძის ბრალდებას და თვითმმართველობის არჩევნებამდე რამდენიმე დღით ადრე საკუთარი კანდიდატურის მოხსნის რამდენიმე მიზეზს ასახელებს.

„ჩემი კანდიდატურის მოხსნის მიზეზი იყო იმ ვალდებულებების შეუსრულებლობა, რომელიც შევპირდით იმ ადამიანებს, ვინც მუშაობდა საარჩევნოდ. არჩევნების დასრულების შემდეგ მე ვერ ავუხსნიდი ჩემს გუნდს და კოორდინატორებს, თუ რატომ ვერ შევასრულე ის, რასაც დავპირდი და რატომ არ გადაუხადა ცენტრმა მათ ის თანხა, რასაც დაპირდნენ არაერთხელ. იყო სხვა მიზეზებიც, კონკრეტულად, ანა წითლიძის სხვადასხვა ტიპის გამოხტომები. პრაქტიკულად პარტიის დაშლის მთავარი მოზეზი გახდა. ამის შემდეგ იყო ის მუქარები და სიბინძურეები, რომლებიც უკვე რამდენი ხანია გვესმის მისგან. მე არ მინდოდა ამ პრობლემებზე საუბარი, მაგრამ წითლიძე უკვე ყველა ზღვარს გადასცდა. ეს არის ადამიანი, რომელსაც არც მენეჯმენტი შეუძლია, არც ურთიერთობა იცის და ყველაფერს აკეთებს იმისთვის, რომ მხოლოდ საკუთარი ინტერესები დაიკმაყოფილოს“, - აღნიშნა თოლორაიამ.

რაც შეეხება „ევროპულ საქართველოში“ მის გაწევრიანებას, თოლორაიას განმარტებით, აღნიშნული გადაწყვეტილება სწორედ ზემოაღნიშნული მოვლენების ფონზე მიიღო.

დეპუტატი კატეგორიულად უარყოფს ბრალდებებს სუს-თან დაკავშირების შესახებ და ამბობს, რომ მის მიმართ სხვადასხვა მუქარა ხორციელდება. საკრებულოს წევრი, რომელიც ამ დრომდე არცერთ სხდომას არ დასწრებია, წარმომადგენლობით ორგანოში მისვლასა და საკუთარი უფლებამოსილების განხორციელებას აპირებს.

„სწორედ ამ სიბინძურეების ფონზე მივიღე „ევროპულ საქართველოში“ გაწევრიანების გადაწყვეტილება. რაც შეეხება იმას, რომ მე არ მაქვს უფლება ვიყო საკრებულოს წევრი, მინდა გითხრათ, რომ ამ პარტიისთვის მე წითლიძეზე ბევრად მეტი მაქვს გაკეთებული და ჩემი სიაში მესამე ნომრად ყოფნაც ამის დასტურია. თუ მე სუს-ის აგენტი ვიყავი და ეს იცოდნენ, როგორ მოხდა, რომ სიაში მესამე ვიყავი? ყოველივე ამის ფონზე მე დავტოვე ენმ და დღეს ვარ „ევროპული საქართველოს“ წევრი. ვარ საკრებულოს წევრი და ვაპირებ ჩემი უფლებამოსილების განხორციელებას. რაც შეეხება იმას, რომ მე წითლიძე საკრებულოში არ შემიშვებს, წითლიძე არ არის კანონი, მე კანონი მაძლებს ამის უფლებას. წითლიძის მხრიდან არა მარტო ჩემზე ხორციელდება მუქარა, არამედ ჩემი ოჯახის წევრებზე და იმ ზღვრამდეა მისული, რომ უკვე დანაშაულებრივ ქმედებებისკენაც უბიძგებს საკუთარ თანაგუნდელებს“, - თქვა გელა თოლორაიამ.

თავის მხრივ, ანი წითლიძე ამბობს, რომ გელა თოლორაიას ნებისმიერი განცხადება უინტერესოა, რადგან, მიის მტკიცებით, „ევროპული საქართველოს“ წევრი სუს-ის დავალებებს ასრულებს.

„გელა თოლორაია არის მანდატების ქურდი და სუს-ის აგენტი, რომელიც პირდაპირ ასრულებს სუს-ის დავალებას, მან ფულზე უკვე გაყიდა საკუთარი თავი და ოჯახი და ნებისმერი მისი განცხადება არის უინტერესო ჩვენთვის. „ევროპულ საქართველოს“ უნდა ესმოდეს, რომ ფრაქციას ქმნის სუს-ის აგენტთან ერთად და სამწუხაროა, რომ ხელფასი აღმოჩნდა განმსაზღვრელი საბოლოოდ მისთვის. თოლორაიას მოუწევს პასუხის გაცემა არა ანა წითლიძესთვის, არამედ საკუთარი ამომრჩევლისთვის, რომელთაც მას ხმა მისცეს, როგორც „ნაციონალური მოძრაობის“ წევრს. ამიტომ რა განცხადებაც არ უნდა აკეთოს, ეს არის პირდაპირ სუს-ი, რომელიც გელა თოლორაიას პირით გველაპარაკება“, - უთხრა რადიო „ათინათს“ წითლიძემ.

ენმ-დან კორცხელის მაჟორიტარი დეპუტატობის კანდიდატმა გელა თოლორაიამ კანდიდატურა 2017 თვითმმართველობის არჩევნებამდე რამდენიმე დღით ადრე მოიხსნა, თუმცა ზუგდიდის საკრებულოს წევრი მაინც გახდა. „ერთიან ნაციონალურ მოძრაობაში“ მისი საქციელი ღალატად შეაფასეს და თოლორაიას სუს-ის აგენტი უწოდეს. თოლორაია ახალი მოწვევის საკრებულოს არცერთ სხდომას არ დასწრებია. მისი მიზეზით სხდომაზე ხმაური არაერთხელ იყო.