ზუგდიდის რაიონულმა სასამართლომ ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე დაკავებულ პირს აღმკვეთ ღონისძიებად პატიმრობა შეუფარდა.

მოსამართლე ირაკლი აბშილავამ სრულად დააკმაყოფილა პროკურატურის შუამდგომლობა.  ბრალდებულმა თქვა, რომ წარდგენილ ბრალს ნაწილობრივ აღიარებს.

“მხოლოდ ცემაში ვგრძნობ თავს დამნაშავედ. განზრახ მკვლელობაში არა”, - აღნიშნა დაკავებულმა სხდომაზე.

მორიგი სასამართლო სხდომა 19 ივნისს ჩაინიშნა. 

შეგახსენებთ, 23 მაისს, ზუგდიდის მუნიციპალიტეტის სოფელ კორცხელში 55 წლამდე ასაკის ქალი ქმარმა მოკლა. შსს ინფორმაციით გამოძიებით დადგინდა, რომ ბრალდებულმა, ზუგდიდის მუნიციპალიტეტში, მეუღლეს - 1966 წელს დაბადებულ ფ.კ.-ს ბლაგვის საგნის გამოყენებით თავის არეში დაზიანებები მიაყენა, დაშავებული ქალი სამედიცინო დაწესებულებაში მოათავსეს, თუმცა მისი გადარჩენა ვერ მოხერხდა.

მოკლული ქალის მეუღლე, 51 წლის მამაკაცი სამართალდამცველებმა ბრალდებული 24 მაისს დააკავეს.

სამინისტროს ცნობით, დანაშაული 16-დან 20 წლამდე ან უვადო თავისუფლების აღკვეთას ითვალისწინებს.