ზუგდიდის მუნიციპალიტეტის საკრებულოში 21-ედ ვერ შედგა კვორუმი. შესაბამისად, სხდომა, რომელზეც გახარიას პარტიიდან საკრებულოს თავმჯდომარის, ასევე, მისი ორივე მოადგილისა და კომისიების თავმჯდომარეების გადაყენებაზე უნდა ემსჯელათ, კიდევ ერთხელ გადაიდო.

საკრებულოს თავმჯდომარემ გიგა ფარულავამ ზუგდიდის მუნიციპალიტეტის მერს და"ქართული ოცნება - დემოკრატიული საქართველოს" ზუგდიდის ორგანიზაციის თავმჯდომარეს მამუკა წოწერიას წერილით მიმართა და მოუწოდა,  შეწყვიტონ საკრებულოს საქმიანობის ბოიკოტირება.

"მოგიწოდებთ, როგორც "ქართული ოცნება-დემოკრატიული საქართველოს" ზუგდიდის ორგანიზაციის თავმჯდომარემ, აიღოთ პასუხისმგებლობა თქვენ მიერ წამოწყებულ ინიციატივაზე. უზრუნველყოთ,საკრებულოს სხდომაზე ფრაქცია "ქართული ოცნება-დემოკრატიული საქართველოს" წევრების დასწრება. შეწყვიტოთ საკრებულოს საბოტაჟი, რაც საფრთხეს უქმნის ზუგდიდის მუნიციპალიტეტში როგორც მერიის, ასევე საკრებულოს ფუნქციონირებას და მოქალაქეების ინტერესებს", - წერს ფარულავა.

წერილში ჩამოთვლილია ის საკითხები, რომელთა განხილვასაც ადგილობრივი საკანონმდებლო ორგანო კვორუმის არარსებობის გამო ვერ ახერხებს.

შეგახსენებთ, 10 აპრილს ადგილობრივ წარმომადგენლობით ორგანოში "ქართულმა ოცნებამ" და "ხალხის ძალამ" საკრებულოს ოპოზიციონერი თავმჯდომარისა და კომისიების წევრთა იმპიჩმენტის შესახებ წინადადება დაარეგისტრირეს. 31 მაისიდან კი ვერ ხერხდება სხდომების განახლება. ამ დღეს "ერთიანი ნაციონალური მოძრაობის" წევრები შენობაში არ გამოცხადდნენ, "ქართული ოცნების" დეპუტატებმა კი, სხდომათა დარბაზში ყოფნის მიუხედავად, რეგისტრაცია არ გაიარეს.

დღის წესრიგის მიხედვით, მათ, გახარიას პარტია "საქართველოსთვის" წარმომადგენლის გიგა ფარულავას, მისი სამივე მოადგილის - ამავე პარტიის წევრ მალხაზ თორიას, ყოფილი ენმ-სა და ამჟამად "ახალის" წევრების თემურ ბასილაიასა და კახაბერ ჩანგელიას პოსტებიდან გადაყენების საკითხებზე უნდა ემსჯელათ.

გადაწყვეტილების მისაღებად, 45 მანდატიან საკრებულოში, სულ ცოტა, 23 ხმაა საჭირო, თუმცა, "ქართულ ოცნებას" მხოლოდ 20 წარმომადგენელი ჰყავს.


ამავე თემაზე: 

ოპოზიციონერი საკრებულოს თავმჯდომარის გადაყენების საკითხი ზუგდიდში კვლავ გადაიდო

ზუგდიდის საკრებულოში "ენმ" და "ქართული ოცნება" არ გამოცხადდა - თავმჯდომარის გადაყენება კვლავ გადაიდო

სხდომა, რომელზეც საკრებულოს ოპოზიციონერი თავმჯდომარე და მისი მოადგილეები უნდა გადაეყენებინათ, ჩაიშალა

ოპოზიციონერი თავმჯდომარისა და კომისიების ხელმძღვანელების გადაყენება, შეუმდგარი კვორუმი და ბრალდებები - რა ხდება ზუგდიდის საკრებულოში

მომავალ კვირაში ზუგდიდის საკრებულო ოპოზიციონერი თავმჯდომარის, მოადგილეებისა და თანამდებობის პირების გადაყენებას განიხილავს