საჯარო რეესტრის ეროვნული სააგენტოს თავმჯდომარემ დავით დევიძემ საკონსტიტუციო სასამართლოში ე.წ აგენტების კანონის განხილვისას ყურადღება გაამახვილა განსაკუთრებული კატეგორიის პერსონალურ მონაცემებზე, თუ რა შემთხვევაში მოითხოვს რეესტრი მის გამოთხოვას.

მისი თქმით, 3 სექტემბრიდან საჯარო რეესტრი ვალდებული იქნება, აწარმოოს ორგანიზაციების მონიტორინგი.

"თუ კი განსაკუთრებული კატეგორიის მუხლზე მიუთითა კანონმა, ეს საჯარო რეესტრს აძლევს საშუალებას, რომ ორგანიზაციას, რომელსაც სურს თავი აარიდოს კანონით გათვალისწინებულ რეესტრში რეგისტრაციას, ჩვენ შეგვიძლია გამოვითხოვოთ ინფორმაცია და ჩავატაროთ სრულფასოვანი მონიტორინგი. ეს გულისხმობს იმას, რომ არ უნდა დაგვხვდეს ისეთი ბარიერები, როგორიცაა "ეს განსაკუთრებული კატეგორიის პერსონალური მონაცემია". წინასწარ ვერავინ იტყვის, საქმის შინაარსისგან გამიჯვნით, რა ტიპის მონაცემი იქნება საჭირო. ყველა საქმე არის უნიკალური და ერთმანეთისგან დამოუკიდებელი. ბუნებრივია, საქმის შინაარსიდან გამომდინარე, ჩვენ შეიძლება დაგვჭირდეს და მეტწილად დაგვჭირდება პერსონალური, მათ შორის განსაკუთრებული პერსონალური ინფორმაცია, თუ განზრახვაა, რომ მოგვატყუონ და ვერ შევასრულოთ კანონით დადგენილი ვალდებულება", - თქვა დევიძემ.

ცნობისთვის, "პერსონალურ მონაცემთა დაცვის შესახებ" კანონის მიხედვით, განსაკუთრებული კატეგორიის მონაცემები გულისხმობს: ფიზიკური პირის რასობრივ ან ეთნიკურ კუთვნილებას,

პოლიტიკურ შეხედულებებს,

რელიგიურ, ფილოსოფიურ ან სხვაგვარ მრწამსს,

პროფესიული კავშირის წევრობას, ჯანმრთელობას,

სქესობრივ ცხოვრებას,

ბრალდებულის, მსჯავრდადებულის, გამართლებულის ან დაზარალებულის სტატუსს სისხლის სამართლის პროცესში, მსჯავრდადებას, ნასამართლობას, განრიდებას,

ადამიანით ვაჭრობის (ტრეფიკინგის) ან "ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ" საქართველოს კანონის შესაბამისად დანაშაულის მსხვერპლად ცნობას, პატიმრობას და მის მიმართ სასჯელის აღსრულებას

აგრეთვე ბიომეტრიული და გენეტიკური მონაცემებს, რომლებიც ფიზიკური პირის უნიკალური იდენტიფიცირების მიზნით მუშავდება.

29 აგვისტოს საკონსტიტუციო სასამართლომ "უცხოელი აგენტების" შესახებ კანონის განხილვა დაიწყო. სხდომაზე განიხილავენ კანონის წინააღმდეგ შეტანილ ოთხ სარჩელს: 121 არასამთავრობო და მედია ორგანიზაციის, პრეზიდენტის და ოპოზიციონერი დეპუტატების, ასევე, მედიების - "მთის ამბებისა" და "სტუდია მონიტორის". განმწესრიგებელი სხდომა 31 აგვისტოს დასრულდება.

შეგახსენებთ, 1 აგვისტოდან ე.წ უცხოელი აგენტების კანონი ძალაში შევიდა. ის არასამთავრობო და მედია ორგანიზაციების მიერ საჯარო რეესტრის ეროვნულ სააგენტოში უცხოური ინტერესების გამტარებელ ორგანიზაციად დარეგისტრირებას გულისხმობს და ის სავალდებულოა ყველა ორგანიზაციისთვის, რომლის მთლიანი შემოსავლის (1 წლის განმავლობაში) 20%-ზე მეტი უცხო ქვეყნისგან მიღებული დაფინანსებაა.

ინფორმაციისთვის, საქართველოს პარლამენტმა, 84 ხმით, კანონპროექტი პირველი მოსმენით - 17 აპრილს, მეორე მოსმენით - 1 მაისს, მესამე მოსმენით კი - 14 მაისს მიიღო. პრეზიდენტმა მას ვეტო 18 მაისს დაადო.

საკანონმდებლო ორგანომ პლენარულ სხდომაზე, კვლავ 84 ხმით, "აგენტების" კანონზე პრეზიდენტის ვეტო 28 მაისს დაძლია. მის გასაპროტესტებლად ქვეყანაში საპროტესტო აქციები პერმანენტულად მიმდინარეობდა, მოქალაქეების ნაწილი განმარტავს, რომ კანონის მიღებით ხელისუფლებამ დასავლური კურსიდან გადაუხვია.


ამავე თემაზე: 

არასამთავრობო ორგანიზაციები "აგენტების" კანონს საკონსტიტუციო სასამართლოში გაასაჩივრებენ

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)

რადიო "ათინათი" სხვა მედიებთან ერთად ე.წ აგენტების კანონის პარლამენტში წარდგენას აპროტესტებს

გადაუხვია თუ არა ხელისუფლებამ ევროკავშირისკენ მიმავალი გზიდან - ადგილობრივების პასუხები (ვიდეო)

ქვარაია, თოლორაია, ბერაია, ხახუბია - "აგენტების კანონის" მხარდამჭერები სამეგრელოდან