დღეს, 1 ოქტობმბერს, გალში ტყის ხანძრის ცალკეული კერების ქრობა გაგრძელდა. აფხაზეთის დე ფაქტო რესპუბლიკის საგანგებო სტუაციების მართვის სამინისტროს ინფორმაციით, ამ დროისთვის ვითარება სტაბილურია და ხანძრის სალიკვიდაციო სამუშაოებში მხოლოდ ადგილობრივი ძალებია ჩართული.

ხანძარი ქ. გალში და გალის რაიონის სოფელ მახუნჯიასთან, 29 სექტემბერს გაჩნდა. ცეცხლი მანდარინის პლანტაციებს მოედო და დაახლოებით, 20 ჰექტარზე გავრცელდა. გალის რაიონის ე.წ. ადმინისტრაციამ სახანძრო განგაში გამოაცხადა და მოსახლეობას სიფხიზლისკენ მოუწოდა. ხანძრის ქრობაში გალის, ოჩამჩირის და ტყვარჩელის მეხანძრე - მაშველებთან ერთად, „ენგურჰესის“ სახანძრო სამაშველო ბრიგადა მონაწილეობდა.

30 სექტემბერს „საგანგებოს“ ხელმძღვანელმა განაცხადა, რომ გალში გაჩენილი ხანძარი ლოკალიზებულია, სიტუაცია კონტროლს ექვემდებარება და მოსახლეობას საფრთხე არ ემუქრება.