აფხაზეთიდან დევნილი მოსახლეობის ნაწილი, რომელსაც ფაქტობრივი მისამართი საქართველოს კონტროლირებად ტერიტორიაზე არ აქვს, აცხადებს, რომ საარჩევნო სიაში არ იძებნება და შესაბამისად, არჩევნებში მონაწილეობის უფლება არ ეძლევა.

რადიო "ათინათს" ერთ-ერთი მოქალაქე უყვება, რომ მისი იურიდიული მისამართი საქართველოს ოკუპირებულ ტერიტორიაზეა, თუმცა თვითონ რამდენიმე წელია, ზუგდიდში ცხოვრობს. მისი თქმით, წელს ის სრულწლოვანი გახდა და პირველად უნდა მიეღო არჩევნებში მონაწილეობა.

"დაახლოებით ერთი თვის წინ, ვცადე საკუთარი თავის გადამოწმება. ჩემი დევნილის მოწმობაში ფაქტობრივ მისამართად წერია " სამეგრელო-ზემო სვანეთის მხარე - ზუგდიდის მუნიციპალიტეტი - მისამართის გარეშე", ამიტომ დავინტერესდი ცესკოს ვებ გვერდზე როგორ იყო მითითებული ჩემი მონაცემები, თუმცა ის არ მოიძებნა. 20-25 დღის წინ, მივედი იუსტიციის სახლში, სადაც მითხრეს, რომ მისამართის გარეშე ვარ და გადამამისამართეს დევნილთა სააგენტოს ტერიტორიულ ორგანოსთან. მათ მითხრეს, რომ უნდა დავრეგისტრირებულიყავი იქ, სადაც ამჟამად ვცხოვრობ, წინააღმდეგ შემთხვევაში, ხმის მიცემის უფლება არ მექნებოდა. თუმცა, მე ნაქირავებ ბინაში ვცხოვრობ დროებით, ჩემი ნათესავებიც ზუგდიდში არ ცხოვრობენ რომ მათთან დავრეგისტრირდე", - ამბობს ჩვენი რესპონდენტი.

მისივე თქმით, მან რამდენჯერმე მიმართა ცესკოს, იუსტიციის სახლს და დევნილთა, ეკომიგრანტთა და საარსებო წყაროებით უზრუნველყოფის სააგენტოს, თუმცა პრობლემის გადაჭრის გზას არცერთი მათგანი არ სთავაზობდა.

"ძირითადად ერთმანეთთან მამისამართებდნენ, სრულიად უშედეგოდ. ეს საკითხი უნდა მოგვარდეს. მსგავსი პრობლემა აქვთ ჩემი ოჯახის სხვა წევრებს, ასევე ჩემს მეზობლებს, რომლებიც აფხაზეთში ცხოვრობენ. მათაც არ აქვთ მისამართი ზუგდიდში და ვერ ახერხებენ არჩევნებში ხმის მიცემას. ჩვენც საქართველოს მოქალაქეები ვართ. მე რამდენიმე წელია, ვცხოვრობ აქ, ვმუშაობ და ვიხდი გადასახადებს. არ მესმის, რატომ არ უნდა მქონდეს ადამიანის ფუნდამენტური უფლებებიდან ერთ-ერთი ყველაზე მთავარი, არჩევნებში მონაწილეობის უფლება. სამწუხარო ფაქტია და კანონმდებლობა ამ მიმართულებით უნდა დაიხვეწოს", - დასძენს ის.

ცნობისთვის, რამდენიმე დღის წინ, საზღვარგარეთ მცხოვრები დევნილების ნაწილი ანალოგიური პრობლემის შესახებ საუბრობდა. მათ განაცხადეს, რომ ამომრჩეველთა ერთიან საარჩევნო სიაში ვერ მოხვდნენ. მათი განმარტებით, ისინი რეგისტრირებული არიან საქართველოს საკონსულოებში, აქვთ ქართული პირადობის დამადასტურებელი დოკუმენტები, თუმცა, იმ მიზეზით, რომ საქართველოს კონტროლირებად ტერიტორიაზე ფაქტობრივი მისამართი არ აქვთ და რეგისტრაციის ადგილად საქართველოს ოკუპირებული ტერიტორიები აქვთ მითითებული, არჩევნებში ხმის მიცემის უფლება ეზღუდებათ.

სახალხო დამცველის, სამოქალაქო სექტორისა და საზოგადოების გამოხმაურების შემდეგ, 5 ოქტომბერს ცესკომ მიიღო დადგენილება და დევნილ ემიგრანტებს არჩევნებში მონაწილეობისთვის რეგისტრაციის უფლება 7 ოქტომბრის ჩათვლით მისცა.

ამასთან, ცესკოში განმარტავენ, რომ საარჩევნო უფლება უნივერსალური არაა და საქართველოს მოქალაქეები არჩევნებში მონაწილეობისთვის კანონით გათვალისწინებულ ნორმებს უნდა აკმაყოფილებდნენ. ცენტრალური საარჩევნო კომისიის ცნობით, დევნილი მოქალაქე, რომელსაც ფაქტობრივი მისამართი საქართველოს ტერიტორიაზე არ უფიქსირდება და მასზე ინფორმაციას ცესკოს დევნილთა სამინისტრო არ აწვდის, ამომრჩეველთა ერთიან სიაში ვერ მოხვდება.