აფხაზური ოპოზიცია არ აპირებს შეასრულოს თვითგამოცხადებული რესპუბლიკის ე.წ. პრეზიდენტის ასლან ბჟანიას მოთხოვნა სამთავრობო შენობების კომპლექსის დაცლასთან დაკავშირებით.
ამის შესახებ "აფხაზეთის სახალხო მოძრაობის" ლიდერმა ადგურ არძინბამ „პრეზიდენტის“ ადმინისტრაციის შენობასთან გამართულ აქციაზე განაცხადა.

„ეს მიუღებელია. ის (ასლან ბჟანია - რედ.) აქ აღარ შემოვა“, - ხაზგასმით აღნიშნა მან და დასძინა, რომ თანამდებობიდან წასვლის შესახებ განცხადების და დაწერა მას ნებისმიერ ადგილას შეუძლია.

არძინბამ „ხელისუფლებას“ კომპრომისული წინადადებით მიმართა:

„წინ საპრეზიდენტო არჩევნებია. როგორც გავიგე, მათში მონაწილეობას ასლან ბჟანიაც აპირებს. მაგრამ რომც არ მიიღოს მონაწილეობა არჩევნებში, ალბათ, ხელისუფლების გუნდიდან ვიღაცას მოუნდება კენჭი იყაროს. თუ გადავწყვეტთ, რომ მოქმედი ვიცე-პრეზიდენტი (ბადრა გუნბა) პრეზიდენტის მოვალეობის შემსრულებლად დარჩება, მაშინ მინისტრთა კაბინეტი მთლიანად გადადგება. დღევანდელი პრემიერის ადგილზე ჩვენგან ინიშნება ადამიანი, კომპრომისული პიროვნება. ამ გზით ვაბალანსებთ აღმასრულებელ ხელისუფლებას, რათა მომავალ საპრეზიდენტო არჩევნებზე ადმინისტრაციული რესურსი არ იყოს გამოყენებული დღევანდელი გუნდის წარმომადგენლის მხარდასაჭერად“, - განაცხადა არძინბამ.

მისი თქმით, ასლან ბჟანიას რამდენიმე დელეგაცია გაუგზავნეს.

„დილამდე ითხოვა დრო, ამბობს, რომ გადადგება - ჰოდა, გააკეთოს!“, - აღნიშნა არძინბამ.

ტელეგრამის არხების თანახმად, 15 ნოემბერს, როდესაც სოხუმში მასშტაბური პროტესტი დაიწყო, ოპოზიციამ ხელისუფლებას ორი ვარიანტი შესთავაზა:

„ან პრეზიდენტი, ვიცე-პრეზიდენტი და პრემიერ-მინისტრი ტოვებენ თანამდებობებს, ხოლო პრეზიდენტის მოვალეობებს არჩევნებამდე ასრულებს პარლამენტის თავმჯდომარე ლაშა აშუბა;

ან პრეზიდენტი, ვიცე-პრეზიდენტი და პრემიერ-მინისტრი გადადგებიან, მაგრამ მანამდე პრეზიდენტი პრემიერ მინისტრად ნიშნავს კომპრომისულ ფიგურას, რომელიც პრეზიდენტის მოვალეობას შეასრულებს“.

17 ნოემბერს პროეტსტის მონაწილეებმა განაცხადეს, რომ იმ შემთხვევაში, თუ ასლან ბჟანიას გადადგომის მოთხოვნა არ დაკმაყოფილდება, ოპოზიციის საკოორდინაციო საბჭომ, შესაძლოა, დროებითი მთავრობა შექმნას.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“. მომიტინგეები ე.წ. პარლამენტის შენობაში შეიჭრნენ და "პრეზიდენტის" ადმინისტრაციის ღობე გაარღვიეს.