ზუგდიდში, მოქალაქეების ნაწილის უწყვეტი პროტესტი გრძელდება. დღეს, 23 დეკემბერს, 17:00 საათზე სახელმწიფო რწმუნებულის ადმინისტრაციის შენობასთან მორიგი აქცია დაანონსდა.

ორგანიზატორების ინფორმაციით, პროევროპული აქციის მონაწილეების მოთხოვნები უცვლელია, ჩაინიშნოს ხელახალი არჩევნები და გათავისუფლდნენ თბილისში, აქციებისას დაკავებული პროტესტის მონაწილეები.

ცნობისთვის, მას შემდეგ, რაც საქართველოს პრემიერ-მინისტრმა ირაკლი კობახიძემ 28 ნოემბერს განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, უწყვეტი საპროტესტო აქციები იმართება.