ზუგდიდში, საპროტესტო აქციამ მსვლელობით გადაინაცვლა სახელმწიფო რწმუნებულის ადმინისტრაციის შენობასთან. მანამდე მოქალაქეები მერიასთან მივიდნენ.

პროტესტის მონაწილეების თქმით, რომ მათი მოთხოვნები უცვლელი რჩება, რაც ხელახალი არჩევნების ჩატარებასა და თბილისში, აქციებისას დაპატიმრებული მოქალაქეების გათავისუფლებას გულისხმობს.

“აქციების ფორმატი შეიცვალა და ორ სახელმწიფო დაწესებულებასთან იმართება, ჯერ მერიასთან, შემდეგ კი სამხარეო ადმინისტრაციის შენობასთან, ნურავინ იფიქრებს იმას, რომ დავიღალეთ, ეს პროტესტი გაგრძელდება, სანამ არ დაკმაყოფილდება ეს ორი მოთხოვნა, ეს არის ბრძოლა საქართველოს ევროპული მომავლისთვის“, - ამბობს „კოალიცია ცვლილებებისთვის“ წარმომადგენელი დავით ქანთარია.

მარიამ ნარმანიამ, შოთა მესხიას სასწავლო უნივერსიტეტის სტუდენტმა თქვა, რომ მშვიდობიან, ნათელ, პერსპექტიულ, ევროპულ საქართველოში სურს იცხოვროს და სწორედ ამიტომ უერთდება პროტესტს:

„არ გვინდა, რომ გვეშინოდეს, მინდა დაცული იყოს ჩვენი ქვეყანა, ელემენტარულად, პოლიციის იმედი რომ გვქონდეს, თოთოეულ ჩვენს მოქალაქეს კეთილდღეობას ვუსურვებ, 21- ე საუკუნეა და ნებისმიერ ჩვენთაგანს უნდა ჰქონდეს იმის შეგნება, რომ როცა შენს ქვეყანას უჭირს, მის გვერდით უნდა დადგე, აქ არ არის საუბარი, რომელიმე კონკრეტულ პარტიაზე“, - დასძინა მან.

აქციის მონაწილე ვიკა თორიამ აღნიშნა, რომ ზუგდიდში მიმდინარე აქციებთან ერთად, ქალაქში ხვალ, ქალთა მარშიც არის დაგეგმილი და მოუწოდა მსურველებს, შეუერთდნენ მას.

შეკრებილებმა ადგილზ მიიტანეს ბანერი, წარწერით: „ვითხოვთ ხელახალ არჩევნებს“, ასევე სხვადსახვა თაობის ადამიანებს ხელში უჭირავთ საქართველოს და ევროკავშირის დროშები. აქვე დამონტაჟებული მონიტორი, რომელზეც მოქალაქეები თბილისში და საქართველოს სხვა ქალაქებში მიმდინარე საპროტესტო აქციების ტრანსლაციას უყურებენ.

შეგახსენებთ, 28 ნოემბრიდან, თბილისსა და საქართველოს სხვა ქალაქებში, მათ შორის, ზუგდიდში, პერმანენტული საპროტესტო აქციები იმართება. მოქალაქეები აპროტესტებენ „ქართული ოცნების“ გადაწყვეტილებას, საქართველოს ევროკავშირთან მოლაპარაკებების შეჩერების შესახებ.

ამავე თემაზე:

"საჯარო მოხელეებს უნდა შევახსენოთ, რაც ქვეყანაში ხდება" - საპროტესტო აქცია მერიის შენობასთან იმართება (ფოტო)

ზუგდიდში საპროტესტო აქცია საახალწლო ღონისძიებების პარალელურად მიმდინარეობს (ფოტო/ვიდეო)

„საქართველო - ევროპაა“, - პროტესტის 25-ე დღე ზუგდიდში (ფოტო)