31 დეკემბერს, 22:00 საათზე, ზუგდიდში მორიგი პროევროპული აქცია გაიმართება. მოქალაქეები ახალ წელს სახელმწიფო რწმუნებულის ადმინისტრაციის შენობასთან შეხვდებიან.

აქციის ორგანიზატორები აღნიშნავენ, რომ წელს საზოგადოების მთავარი სურვილი საქართველოს თავისუფლება და ევროინტეგრაციის გზაზე დაბრუნება იქნება.

"ამბობენ, რომ ახალი წელი ის დღეა, რომელსაც შენთვის ძვირფას ადამიანებთან ერთად უნდა შეხვდე და ვინ გვყავს ერთმანეთზე ძვირფასი იმ ადამიანებს, ვინც ერთმანეთი ბრძოლის ველზე გავიცანით? ვინც დარსა და ავდარში ერთად ვიდექით, ვინც ათეულობით კილომეტრი ვიარეთ მთელს ქალაქში "საქართველოს გაუმარჯოს!" ძახილით, ვინც ჩვენი ჩაჭიდებული ხელებით შევკარით ერთობის ჯაჭვი, ვინც დავიჯერეთ, რომ ერთად დიდი ძალა ვართ და შეგვიძლია ჩვენი ქვეყნის გადარჩენა", - ვკითხულობთ სამოქალაქო სოლიდარობის ფონდის ფეისბუქ გვერდზე.

მათი თქმით, ხვალ, აქციის მონაწილეები ერთმანეთს ბრძოლის მოტივაციასა და დადებით ენერგიას გაუზიარებენ.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.


ამავე თემაზე:

ზუგდიდში პროევროპული აქციები გრძელდება - პროტესტის 32-დღე (ფოტო)

პროტესტის ერთი თვე ზუგდიდში (ფოტორეპორტაჟი)

"ვითხოვთ ხელახალ არჩევნებს" - ზუგდიდში ქალთა მარში გაიმართა (ფოტო)