ზუგდიდში უწყვეტი პროტესტი გრძელდება. მოქალაქეები, სახელმწიფო რწმუნებულის ადმინისტრაციის შენობასთან ისევ შეიკრიბნენ.
დღევანდელ აქციაზე არ ყოფილა სიტყვით გამოსვლები და არც მუსიკა ჩაურთავთ. გლოვის დღესთან დაკავშირებით დემონსტრანტებმა, წუთიერი დუმილით პატივი მიაგეს ოკუპირებული აფხაზეთის ტერიტორიაზე, გალის რაიონის სოფელ საბერიოში ხანძრის შედეგად დაღუპული მოზარდების ხსოვნას.

აქციის ერთ - ერთ მონაწილეს შალვა ესართიას დღეს სახეზე შარფი ქონდა აფარებული, მას შემდეგ, რაც მას პოლიციამ შენიშვნა მისცა, მოქალაქემ შარფი მოიხსნა და სამედიცინო პირბადე გაიკეთა, თუმცა ის დააჯარიმეს. დღესაც ბალაკლავას ტარების გამო პოლიციამ აქტივისტი და პარტია "დროას" წევრი, მარიამ სიჭინავა უკვე მეხუთედ, ხოლო კერენ ესებუა მესამედ დააჯარიმა. 

ზუგდიდში უკვე 43- ე დღეა იკრიბებიან ქალაქის ცენტრში, სახელმწიფო რწმუნებულის ადმინისტრაციასთან სხვადასხვა ასაკის ადამიანები. მათი მოთხოვნები უცვლელია: დაინიშნოს ხელახალი საპარლამენტო არჩევნები და დაუყოვნებლივ გათავისუფლდნენ თბილისში, საპროტესტო აქციების დროს დაკავებული პირები.

შეგახსენებთ, შაბათს, 11 იანვარს, 14 საათზე ზუგდიდში დაგეგმილ აქციას სალომე ზურაბიშვილი შეუერთდება. ორგანიზატორების თქმით, ქვეყანაში მიმდინარე პროცესებში ზურაბიშვილმა საზოგადოების გამაერთიანებლის ფუნქცია იკისრა და მისი რეგიონული ტურნეს ზუგდიდიდან დაწყება ნიშნავს იმას, რომ ხალხის ბრძოლა ღირებული და მნიშვნელოვანია.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.

ამავე თემაზე:

ზუგდიდში უწყვეტი პროტესტის 39-ე დღეს მდუმარე აქცია გაიმართა (ფოტო)

„ირო წიმი ევროპაშა“, - ახალი წლის პირველ დღეებში აქცია ზუგდიდში უწყვეტად გრძელდება (ფოტო)

დავიბედოთ გამარჯვებისთვის ბრძოლა და გამარჯვება - დღეს ზუგდიდში აქცია გაიმერთება