აფხაზეთის დე ფაქტო რესპუბლიკის ე.წ. პრეზიდენტობის ერთ- ერთმა კანდიდატმა ადგურ ხურხუმალმა განაცხადა, რომ რუსეთმა აფხაზეთს ფაქტობრივად წაართვა „დამოუკიდებლობა“, როცა ის „დამოუკიდებელ სახელმწიფოდ აღიარა“.

ამის შესახებ, მან „აფხაზეთის სახელმწიფო ტელევიზიის“ ეთერში მიმდინარე დებატების დროს ისაუბრა.

მან აღნიშნა, რომ დღეს აფხაზეთისთვის მნიშვნელოვანია, მიაღწიოს თავისი ინტერესების პატივისცემას.

„რუსეთი ჩვენი სტრატეგიული პარტნიორია, ჩვენი მეზობელი. ჩვენ ბოლოს და ბოლოს უნდა მოვიპოვოთ ჩვენი ინტერესების და ჩვენი შეხედულებების მიმართ პატივისცემა. ეს დღეს არ არის. დღეს ჩვენ ვართ დამოკიდებული. როდესაც რუსეთმა ჩვენი დამოუკიდებლობა გამოაცხადა, წაგვართვა იგი. რატომ დავთმეთ ის?" - თქვა მან.

ხურხუმალის მტკიცებით, აფხაზეთი რუსეთთან ურთიერთპატივისცემას უნდა ესწრაფოდეს.

„ჩვენ ხალხთან ერთად შეგვიძლია წინსვლა და განვითარება, ისე რომ რომ მათ [რუსეთს] ჩვენდამი პატივისცემა ჰქონდეთ და ეს ორმხრივი იყოს. ეს არის ის, რასაც დღეს უნდა მივაღწიოთ. პერიმეტრის გასწვრივ საზღვრები უნდა დავკეტოთ, დამოუკიდებლად გამოვიკვებოთ და მთელ მსოფლიოს ვაჩვენოთ, რომ ყველას გარეშე შეგვიძლია ცხოვრება. აი, მაშინ გვექნება დამოუკიდებლობა და ბევრი რამის კეთებას ვისწავლით“, - თქვა ხურხუმალმა.


ცმობისთვის, ოკუპირებული აფხაზეთის „პრეზიდენტობისთვის“ 5 კანდიდატი იბრძოლებს:

"პრეზიდენტის" მოვალეობის შემსრულებელი, - ბადრა გუნბა;

ეკონომიკის ყოფილი "მინისტრი", აფხაზი ოპოზიციონერი - ადგურ არძინბა;

აფხაზეთის ყოფილი "სავაჭრო წარმომადგენელი მოსკოვში" - ოლეგ ბარციცი;

"კონტროლის პალატის" ყოფილი ხელმძღვანელი - რობერტ არშბა;

კომერციული "შავი ზღვის განვითარების ბანკის" გამგეობის თავმჯდომარე, - ადგურ ხურხუმალი.

„საპრეზიდენტო“ არჩევნებში მონაწილეობაზე, ჯანმრთელობის მდგომარეობის გამო, უარი განაცხადა ოპოზიციონერმა „დეპუტატმა“ კან კვარჩიამ.

აფხაზური მედიის ცნობით, თავისი კანდიდატურები ასევე მოხსნეს ბიზნესმენმა ბესლან კვიცინიამ და „სახალხო პარტიის“ლიდერმა შამილ აძინბამ.

ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.