რუსეთის პრეზიდენტმა ვლადიმერ პუტინმა ბადრა გუნბას აფხაზეთის თვითგამოცხადებული რესპუბლიკის "საპრეზიდენტო" არჩევნებში გამარჯვება მიულოცა, წერს "აფსადგილ ინფო". 
„იმედი მაქვს, რომ მეგობრული, სამეკავშირეო რუსულ-აფხაზური ურთიერთობების გაძლიერება მომავალშიც გაგრძელდება, ჩვენი მოძმე ხალხების საკეთილდღეოდ “, - ნათქვამია შეტყობინებაში. 

1 მარტს ოკუპირებულ აფხაზეთში "საპრეზიდენტო" არჩევნების მეორე ტური გაიმართა.

„პრეზიდენტობისთვის“ ორი კანდიდატი იბრძოდა, ბადრა გუნბა, რომელსაც მოსკოვი ღიად უჭერდა მხარს და აფხაზი ოპოზიციონერი, ადგურ არძინბა.

დე ფაქტო ცესკოს მონაცემებით, ბადრა გუნბამ „საპრეზიდენტო“ არჩევნების მეორე ტურში გაიმარჯვა. მან ხმების 54,73% დააგროვა, ხოლო მეორე კანდიდატმა ადგურ არძინბამ - 41,54%.

არჩევნების პირველი ტური 2025 წლის 15 თებერვალს ჩატარდა.

სახელმწიფო მინისტრის აპარატი ეხმიანება ოკუპირებული აფხაზეთის რეგიონში უკანონოდ გამართულ ე.წ. „საპრეზიდენტო არჩევნების მეორე ტურს", რომელიც ეწინააღმდეგება საერთაშორისო სამართლის ფუნდამენტურ პრინციპებს და საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მორიგ უხეშ დარღვევას წარმოადგენს. ამის შესახებ უწყებამ საკუთარ ვებ გვერდზე განცხადება გაავრცელა.

უკრაინის საგარეო უწყებამ გაავრცელა გუშინ განცხადება, რომელშიც ნათქვამია, რომ უკრაინა გმობს და არ აღიარებს "საპრეზიდენტო" არჩევნებს ოკუპირებულ აფხაზეთში.

იმავე თემაზე:

სროლა იყო აფხაზეთში, ერთ - ერთ საარჩევნო უბანზე - მედია

რუსეთის საგამოძიებო კომიტეტმა აფხაზეთში სროლასთან დაკავშირებით, „ტერორიზმის“ მუხლით საქმე აღძრა