შვეიცარიული გამოცემა , Neue Zürcher Zeitung, რომელმაც ოჩამჩირედან სატელიტური სურათები მოიპოვა, ირწმუნება, რომ რუსეთი იქ საზღვაო ბაზის მშენებლობას აგრძელებს.

2025 წლის იანვრის ფოტოებზე ჩანს ოჩამჩირეს პორტის ჩრდილო-დასავლეთ ნაწილში აგებული, დაახლოებით 100 მ სიგრძის რამდენიმე ახალი ნაგებობა.

გამოცემა აღნიშნავს, რომ პორტი შედარებით მცირეა და არც ისე ღრმაა. ჯერჯერობით უცნობია შეძლებენ თუ არა სამხედრო გემები იქ შემოსვლას.

"ოჩამჩირის პორტი ასევე უფრო მცირე იქნება, ვიდრე რუსეთის მიერ გამოყენებული სხვა ობიექტები. რუსული ფლოტის მთავარი ბაზა ადრე მდებარეობდა სევასტოპოლში, რუსეთის მიერ ოკუპირებულ უკრაინის ნახევარკუნძულზე ყირიმში. თუმცა, უკრაინის თავდასხმებმა აიძულა რუსეთი გადაეტანა გემები სხვა ადგილებში", - წერს გაზეთი.

Sovanews- ის თანახმად, სტატიის კომენტირებისას, The Breakfast Show-ის ეთერში, სამხედრო ექსპერტმა იური ფეოდოროვმა განმარტა, რომ ამჟამად ოჩამჩირე უკრაინის მიერ რუსეთის სამხედრო საზღვაო ფლოტის წინააღმდეგ გამოყენებადი უპილოტო საბრძოლო კატარღების მოქმედების ზონაში არ შედის და შესაბამისად, რუსულ გემებს იქ შედარებით უსაფრთხოდ შეუძლიათ როგორც ბაზირება, ისე საბრძოლო ოპერაციებისთვის ზღვაში გასვლა.

"ერთადერთი საბრძოლო ამოცანა, რომლის შესრულებაც სადღეისოდ რუსეთის შავი ზღვის ფლოტს შეუძლია, ეს უმთავრესად უკრაინაზე შეტევებია "კალიბრებით" - საზღვაო ბაზირების ფრთოსანი რაკეტებით. რამდენადაც მესმის, უკრაინის შეიარაღებული ძალები ცდილობენ, მინიმუმამდე დაიყვანონ მსგავსი თავდასხმების რაოდენობა და ამ მიზნით უპილოტო კატარღებს იყენებენ. რუს მეზღვაურებს კი სურთ, იქონიონ უსაფრთხო ბაზა და ოჩამჩირეს პორტსაც ამ მიზნით აშენებენ…იქაური ნავსადგომი საკმაოდ კომფორტულია არცთუ დიდი საბრძოლო ხომალდებისთვის. პრინციპში, იქ შეუძლიათ გაჩერება "კორვეტის" ტიპის გემებს - ეკიპაჟი დაისვენებს, შეივსებს საწვავს, შეუძლია, ჩაატაროს მცირე შეკეთებები და ა.შ.", — განაცხადა ფეოდოროვმა.

2023 წლის ოქტომბრის დასაწყისში, ოკუპირებული აფხაზეთის მაშინდელმა ე.წ. პრეზიდენტმა, ასლან ბჟანიამ ოჩამჩირის რეგიონში რუსეთის საზღვაო ფლოტის მუდმივი ბაზების შექმნის შესახებ განაცხადა. 19 ოქტომბერს გამართულ პრესკონფერენციაზე კი თქვა, რომ "რუსეთის საზღვაო ძალების ბაზის განლაგება ოჩამჩირეში შეესაბამება აფხაზეთის ინტერესებს".

მიუხედავად იმისა, რომ ეს გეგმები რუსეთმა არ დაადასტურა და გამოცხადებიდან რამდენიმე თვის განმავლობაში მცირე აქტივობა იყო, Bellingcat-ის მიერ გაანალიზებული სატელიტური სურათები აჩვენებს, რომ სამშენებლო აქტივობა დაჩქარდა 2024 წლის დასაწყისიდან, პერიმეტრის გარშემო მრავალი შენობა და ობიექტი შენდება.

ბაზას სტრატეგიული მნიშვნელობა ექნება რუსეთისთვის, ექსპერტები ვარაუდობენ, რადგან ის შეიძლება გახდეს შავი ზღვის ფლოტის უსაფრთხო თავშესაფარი, რომელიც უკრაინული თვითმფრინავების თავდასხმის ქვეშ იმყოფება უკრაინაში რუსეთის სრულმასშტაბიანი შეჭრის შემდეგ.

ამავე მოსაზრებით, რუსული საზღვაო ბაზის არსებობამ შეიძლება გავლენა მოახდინოს საქართველოს გეგმებზე, განავითაროს თანამედროვე ღრმაწყლოვანი პორტი ანაკლიაში, ოჩამჩირედან სამხრეთით დაახლოებით 30 კილომეტრში. მრავალმილიარდ დოლარიანი პროექტი მიზნად ისახავს საქართველო გახდეს თვირთბრუნვის დამოუკიდებელი საერთაშორისო სატრანზიტო კვანძი ჩინეთსა და ევროკავშირს შორის.

ოკუპირებული ოჩამჩირის პორტში რუსეთის შავი ზღვის ფლოტის პირველი სამხედრო გემი შესვლაზე 2024 წლის ივლისში საზღვაო თავდაცვის საკითხებზე ორიენტირებულმ ინტერნეტგამოცემა Navalnews - მა გაავრცელა ინფორმაცია.

იმავე თემაზე:


რუსეთი ოჩამჩირის ნავსადგურის სამხედრო პორტად გადასაქცევად მუშაობს - ანტისაოკუპაციო მოძრაობა

ბაზა დამატებითი ინსტრუმენტია, თუმცა მთავარი პრობლემა ოკუპაციაა - პაპუაშვილი ოჩამჩირის პორტში რუსული ფლოტის განთავსებაზე

შამბა ოჩამჩირეში რუსული ბაზის განთავსებაზე - ეს მხოლოდ აძლიერებს ჩვენს უსაფრთხოებას

ოჩამჩირეში რუსული სამხედრო ბაზების განთავსება არღვევს საქართველოს სუვერენიტეტს - სტოლტენბერგი

სოხუმში გააკრეს პლაკატები წარწერით - "აფხაზეთი რუსული ხომალდების ადგილი არ არის!"

ოჩამჩირეში რუსეთის სამხედრო ბაზების განლაგებასთან დაკავშირებით საპარლამენტო ოპოზიცია საერთაშორისო პარტნიორებს მიმართავს

ოჩამჩირეში რუსეთის სამხედრო ბაზების განლაგებასთან დაკავშირებით საპარლამენტო ოპოზიცია საერთაშორისო პარტნიორებს მიმართავს