რუსეთის პრეზიდენტმა ვლადიმერ პუტინმა ხელი მოაწერა ფედერალურ კანონს „რუსეთის ფედერაციის მთავრობასა და აფხაზეთის რესპუბლიკის მთავრობას შორის საქონლით ვაჭრობის რეჟიმის შესახებ შეთანხმებაში ცვლილებების შეტანის ოქმის რატიფიკაციის შესახებ“, იუწყება კრემლის ვებგვერდი.

ფედერალური კანონი სახელმწიფო დუმამ მიიღო 2025 წლის 1 აპრილს და დაამტკიცა ფედერაციის საბჭომ 2025 წლის 2 აპრილს. ოქმს ხელი მოეწერა გროზნოში 2024 წლის 16 ივლისს.

ოქმი ითვალისწინებს შეთანხმებაში იმ დებულებების ჩართვას, რომელთა თანახმად, მიხედვითაც, „საექსპორტო“ გადასახადები არ ვრცელდება ოკუპირებული აფხაზეთისთვის ყველაზე დიდი მნიშვნელობის მქონე საქონელზე, რომელიც „ექსპორტირებულია რუსეთის ფედერაციის ტერიტორიიდან აფხაზეთის რესპუბლიკის საბაჟო ტერიტორიაზე“.

ამავე ცნობით, პროტოკოლი ასევე უფლებას აძლევს ორივე მხარის პასუხისმგებელ ორგანოებს, შეთანხმდნენ „რუსეთის ფედერაციიდან აფხაზეთისთვის შიდა მოხმარებისთვის მიწოდებული მნიშვნელოვანი საქონლის ნომენკლატურასა და მოცულობაზე“.

ადრე დადებული ხელშეკრულება ითვალისწინებდა ბენზინის, დიზელის საწვავის, ბიტუმის და პროპანის შეთანხმებული მოცულობების უბაჟო ექსპორტს.

2024 წლის სექტემბერში მოსკოვი და სოხუმი შეთანხმდნენ საქონელზე, რომელიც "უბაჟოდ" შევა რუსეთიდან აფხაზეთში

თუმცა, 2024 წლის დეკემბრის პირველ ნახევარში, რუსეთის დუმამ განაცხადა, რომ შეაჩერებს ოკუპირებულ აფხაზეთთან „სავაჭრო რეჟიმის შესახებ“ შეთანხმების ოქმის რატიფიცირებას.

ეს მას შემდეგ მოხდა, რაც ნოემბრის პროტესტს სოხუმში, აფხაზი ლიდერის ასლან ბჟანიას გადადგომა და მოსკოვთან „საინვესტიციო ხელშეკრულების“ ჩაგდება მოყვა. მაშინ რუსეთმა თითქმის სრულად შეაჩერა ოკუპირებული აფხაზეთის ბიუჯეტის დაფინანსებაც.

ცნობისთვის, ოკუპირებულ აფხაზეთთან "სავაჭრო რეჟიმის შესახებ მთავრობათაშორისი შეთანხმების ოქმის რატიფიცირების შესახებ" კანონს პუტინმა 2023 წლის ოქტომბერში მოაწერა ხელი.

ამავე წლის ნოემბერში, რუსეთმა დე ფაქტო რესპუბლიკაში გათხევადებული აირის "უბაჟო ექსპორტის" შესახებ ოქმის რატიფიცირება მოახდინა.

1 მარტს ოკუპირებულ აფხაზეთში ვადამდელი "საპრეზიდენტო" არჩევნების მეორე ტური გაიმართა, რომელშიც ბადრა გუნბამ გაიმარჯვა, დე ფაქტო ცესკოს მონაცემებით, მან ხმების 54,73%, ხოლო მისმა მეტოქემ, ოპოზიციონერმა ადგურ არძინბამ - 41,54%.

2 მარტს რუსეთის პრეზიდენტმა, გუნბას გამარჯვება მიულოცა.

5 მარტს პუტინმა გუნბა კრემლში მიიღო, ამასთან, აფხაზებისთვის ორმაგი მოქალაქეობის და სხვა საკითხების მოგვარებას დაჰპირდა, ხოლო 2 აპრილს, „ინაუგურაციის„ დღეს ცნობილი გახდა, გუნბა მოსკოვში მიიწვიეს, 9 მაისს, ფაშიზმზე გამარჯვების აღსანიშნავ ღონისძიებაზე.