გაგრის რაიონში, ფსოუს ე.წ. საგუშაგოსთან სროლაში ეჭვმიტანილები „აფხაზეთის მოქალაქეები“, ჩაგოვეცი კ. და ძმები გოჯუები არიან.

ინფორმაციას აფხაზეთის დე ფაქტო რესპუბლიკის „გენერალური პროკურატურის“ პრესსამსახური ავრცელებს. ამავე ცნობით, ფაქტზე სისხლის სამართლის საქმის აღძვრის ეტაპზე დადგინდა, რომ 23 ივნისს, დაახლოებით, 16:00 საათზე „"Cherry “ - ს მარკის ავტომანქანაში მყოფმა პირებმა, „ფსოუს“ საგუშაგოსთან ცეცხლი გახსნეს კალაშნიკოვის ავტომატიდან და 27 გასროლა განახორციელეს. შედეგად, ასლან აკაბა სასიკვდილოდ დაიჭრა, დაურ კამლია, აიდა ზადიკიანი და ლევან ციციბავა, სხეულის სხვადასხვა არეში ცეცხლსასროლი იარაღიდან მიყენებული ჭრილობებით საავადმყოფოში გადაიყვანეს, სადაც მათ დახმარება გაუწიეს.

დე ფაქტო შსს - ს უფროსის რობერტ კიუტმა გუშინვე განაცხადა, რომ ფსოუს „საკონტროლო - გამშვებ პუნქტთან“ მომხდარ მკვლელობაში ეჭვმიტანილი ოთხი ადამიანი დააკავეს, „მათგან სამი აფხაზეთიდან, ერთი კი რუსეთიდანაა“.

23 ივნისს, ოკუპირებულ აფხაზეთში მომხდარი სროლის შედეგად მოკლეს ერთი ადამიანი, სამი კი დაშავდა. დაშავებულებს შორის ერთი არასრულწლოვანია.

გაგრის რაიონის ე.წ. პროკურატურამ ფსოუს „საგუშაგოსთან“ მომხდარი მკვლელობის ფაქტზე სისხლის სამართლის საქმე აღძრა.