სახელმწიფო უსაფრთხოების სამსახურის განცხადებით, ევროკავშირის სადამკვირვებლო მისიის (EUMM) მიერ ოპერირებული ცხელი ხაზის მეშვეობით შემდგარი კომუნიკაციის შედეგად დამატებით გაირკვა, რომ საოკუპაციო რეჟიმის წარმომადგენლებმა გალის რაიონის სოფელ ოტობაიაში უკანონოდ დააკავეს საქართველოს კიდევ ერთი მოქალაქე.

"კერძოდ, საოკუპაციო რეჟიმის წარმომადგენლებმა, ცხელი ხაზით აღნიშნული დაადასტურეს და განაცხადეს, რომ ამ შემთხვევაშიც, ე.წ. "სისხლის სამართლის საქმე" აღძრულია "უკანონო მიგრაციის ორგანიზების" ე.წ. "ბრალდებით" და უკანონოდ დაკავებულ პირს, ე.წ. "სასამართლოს" მიერ "მიესაჯა" 2 თვიანი "წინასწარი პატიმრობა".
როგორც წინა განცხადებაშიც აღინიშნა, ცენტრალური ხელისუფლების მიერ ამოქმედებულია ყველა არსებული მექანიზმი და მიმდინარეობს აქტიური მუშაობა უკანონოდ დაკავებული პირების დაუყოვნებლივ გათავისუფლების მიზნით", - აღნიშნულია ინფორმაციაში.

უწყების თქმით, საქართველოს მოქალაქეების მიმართ, საოკუპაციო რეჟიმის მხრიდან განხორციელებულ ძალადობრივ და უკანონო ქმედებებთან დაკავშირებით, წარმოებს პერმანენტული კომუნიკაცია ცხელი ხაზის მეშვეობით. ინფორმაცია მიეწოდება ჟენევის საერთაშორისო დისკუსიების თანათავმჯდომარეებს და საერთაშორისო პარტნიორებს.

ცნობისთვის, აფხაზეთის დე ფაქტო სუს - ის ინფორმაციით, გალის რაიონის სოფელ (ბღოურაში) მეორე ოტობაიაში "აფხაზეთის ბინადრობის ნებართვის მქონე", საქართველოს ორი მოქალაქე, რემიკო (50 წლის) და მურთაზ (57 წლის) ჭითანავები დააკავეს. მათი თქმით, ამით არალეგალური მიგრაციის არხის ჩაახშეს. ისინი ამტკიცებენ, რომ დაკავებულთა მფლობელობაში არსებულ სახლებში აღმოჩენილია F1 ხელყუმბარა, ხელყუმბარა, ргд 5, ტროტილი 1600 გ პლასტიდი - 45 გ, სხვადასხვა კალიბრის ვაზნები, ასევე დოლარის კუპიურების დასტა.

ამასთან, დე ფაქტო სუს - ის თანამშრომლებმა, რუსეთის ორი მოქალაქეც დააკავეს, რომლებიც უკანონოდ ცდილობდნენ "აფხაზეთიდან საქართველოში შესვლას". დიმიტრი დენისოვს და ალექსანდრე ლუზენინს ე.წ. საზღვრის გადაკვეთაში 1979 წელს დაბადებული არჩილ საქანია დაეხმარა.

შეგახსენებთ, ოკუპირებულ აფხაზეთში უკანონო პატიმრობაშია საქართველოს კიდევ ორი მოქალაქე: ქრისტინე თაკალანძე, მას ბრალად ედება "ჯაშუშობა" და ე.წ. უზენაესმა სასამართლომ 10 წლითა და 6 თვით თავისუფლების აღკვეთა 2023 წლის 5 მაისს მიუსაჯა; ირაკლი ბებუა, რომელსაც დე ფაქტო სასამართლომ "სახელმწიფო სიმბოლიკის შეურაცხყოფის", "სხვისი ქონების განზრახ დაზიანების" და "საბრძოლო მასალის უკანონოდ შენახვის" ბრალდებით 2020 წლის 7 დეკემბერს 9 წლით თავისუფლების აღკვეთა მიუსაჯა.


ამავე თემაზე: 

სუს-მა გალის რაიონში მცხოვრები საქართველოს ორი მოქალაქის დაკავებასთან დაკავშირებით განცხადება გაავრცელა

გალის რაიონში ოკუპირებული აფხაზეთის ე.წ. სუს-მა საქართველოს ორი მოქალაქე დააკავა

აფხაზეთში ქრისტინა თაკალანძეს 10 წლით და 6 თვით თავისუფლების აღკვეთა მიესაჯა

გალში დაკავებულ ქრისტინე თაკალანძეს სოხუმის სასამართლომ პატიმრობის ვადა გაუხანგრძლივა

"ჯაშუშობის" ბრალდებით აფხაზეთში საქართველოს მოქალაქე დააკავეს

ჟენევის მოლაპარაკებების 51-ე რაუნდზე ირაკლი ბებუას საქმე განიხილეს - სახელმწიფო მინისტრის აპარატი

"აფხაზური" დროშის დაწვისთვის დაკავებულ ირაკლი ბებუას 9 წლიანი პატიმრობა მიესაჯა

ოკუპირებულ აფხაზეთში დაკავებული ირაკლი ბებუას ჯანმრთლობის მდგომარეობა დამძიმდა - სოციალური სამართლიანობის ცენტრი