თსუ-ს ყოფილმა რექტორმა ვლადიმერ პაპავამ უნივერსიტეტის რექტორის მოვალეობის შემსრულებელ დარეჯან თვალთვაძეს წარმატება უსურვა და აღნიშნა, რომ არჩევნებმა დარღვევების გარეშე ჩაიარა, რაც მოცემულ ვითარებაში ძალიან მნიშვნელოვანია.

"ეს არის ძალიან მასშტაბური არჩევნები და უნივერსიტეტმა აჩვენა, რომ მას შესწევს უნარი ყველაზე რთულ სიტუაციაშიც კი ვითარებას გაუმკლავდეს ისე, როგორც შეშვენის ივანე ჯავახიშვილის და მისი თანამოაზრეების მიერ დაფუძნებულ უნივერსიტეტს. მთავარია, რომ არჩევნები ჩატარდა მშვიდ გარემოში, ყველა პროცედურის დაცვით.“, - განაცხადა  პაპავამ.

თსუ-ს რექტორის მოვალეობის შემსრულებლის არჩევნებში 4 კანდიდატი მონაწილეობდა, სადაც ხმათა უმრავლესობა- 526 ხმა დარეჯან თვალთვაძემ მოიპოვა. ლევან გორდეზიანს 236-მა ადამიანმა დაუჭირა მხარი, ცირა ბარამიძემ- 117 ხმა მიიღო, ხოლო გიორგი ანდრიაძემ - 39.