ხეების რაოდენობა დედამიწაზე 3 ტრილიონს აჭარბებს და ეს უფრო მეტია, ვიდრე ადრე ივარაუდებოდა, მოწმობს ამერიკული იელის უნივერსიტეტის მეცნიერების კვლევა. მეცნიერებმა, თომას ქროუტერის ხელმძღვანელობით, ხეების საერთო რაოდენობა თანამგზავრული სურათების და ცალკეული რაიონის გამოკვლევის საფუძველზე დაითვალეს. ამ სამუშაობის ჩატარების შედეგად კი მათ თქვეს, რომ სულ დედამიწაზე 3.04 ტრილიონი ხეა. ხეების უმრავლესობა ტროპიკებში იზრდება, ხოლო ყველაზე მჭიდროდ - ტუნდრიდან სამხრეთით. ამ კვლევის საფუძველი გახდა გაეროს ეგიდით მომუშავე ახალგაზრდული ორგანიზაციის თხოვნა, რომელმაც მიზანდ დაისახა, რომ პლანეტას კიდევ 1 მლრდ ხე შემატოს. ორგანიზაციამ თომას ქროუტერს კითხვით მიმართა, შენელდება თუ არა გლობალური დათბობის პროცესი თუ ისინი 1 მლრდ ხეს დარგავენ და მეცნიერი მივიდა დასკვნამდე, რომ არ შეუძლია ამ კითხვაზე პასუხის გაცემა, სანამ არ ეცოდინება დედამიწაზე ხეების ზუსტი რაოდენობა. სამეცნიერო ჯგუფის ხელმძღვანელმა განაცხადა, რომ მათ მიერ დადგენილი ციფრის განხილვა არ შეიძლება როგორც კარგის, ან ცუდის. თუმცა მან ხაზი გაუსვა, რომ ხეების რაოდენობას საბოლოო ჯამში ადამიანები განსაზღვრავენ: ყოველწლიურად ისინი 15 მლრდ ხეს ჭრიან და 5 მლრდ ახალს რგავენ და შესაბამისად ყოველწლიურად ხეების რაოდენობა 10 მლრდ-ით მცირდება. კომპიუტერულმა მოდელებმა აჩვენა, რომ ადამიანურ ცივილიზაციამდე დედამიწაზე 5.6 ტრილიონი ხე იყო.