დედაქალაქის მერობის კიდევ ერთი კანდიდატი "ნაციონალური მოძრაობიდან" დეპუტატ გიორგი ვაშაძესთან ერთად, მთაწმინდა-კრწანისის გამგებელი ნიკა მელია იქნება. როგორც "ინტერპრესნიუსს" ინფორმირებულმა წყარომ აცნობა, თბილისში გასამართ პრაიმერში მონაწილეობას ეს ორი კანდიდატი გეგმავს და ერთმანეთთან შიდა კონკურენციის გაწევას სწორედ ვაშაძე და მელია შეეცდებიან. ჯერჯერობით უცნობია თბილისის უფლებამოსილებაშეჩერებული მერის, გიგი უგულავას გეგმები – ის ამ საკითხზე განცხადებას დღევანდელ ყრილობაზე გააკეთებს. "ინტერპრესნიუსის" ინფორმაციით, უგულავა თბილისის მერის პოზიციაზე კენჭს სავარაუდოდ არ იყრის, თუმცა გააგრძელებს "ნაციონალური მოძრაობის" თბილისის ორგანიზაციის ხელმძღვანელობას.