25-26 მარტს ჟენევის საერთაშორისო მოლაპარაკებების მორიგი რაუნდი გაიმართება. როგორც ორშაბათის ტრადიციულ პრესკონფერენციაზე საქართველოს საგარეო საქმეთა მინისტრის მოადგილემ, დავით ჯალაღანიამ განაცხადა, საქართველოს დელეგაციას ტრადიციულად საგარეო საქმეთა მინისტრის პირველი მოადგილე დავით ზალკალიანი უხელმძღვანელებს. ჯალაღანიამ აღნიშნა, რომ საქართველოს დელეგაცია კიდევ ერთხელ გამოხატავს მკაცრ პროტესტს საქართველოს ოკუპირებულ რეგიონებში უსაფრთხოებისა და ადამიანის უფლებების კუთხით არსებულ მძიმე ვითარებაზე, ასევე საოკუპაციო ხაზის გასწვრივ მავრთულხლართებისა და ხელოვნური ბარიერების გავლების განახლებასთან დაკავშირებით. "ამასთან, საქართველოს დელეგაცია თანათავმჯდომარეების ყურადღებას გაამახვილებს უკანასკნელ პერიოდში რუსული სამხედრო ვერტმფრენების მიერ საქართველოს ცენტრალური ხელისუფლების კონტროლირებადი საჰაერო სივრცის დარღვევის ფაქტებზე", - განაცხადა დავით ჯალაღანიამ. მისივე თქმით, მოლაპარაკებების ფარგლებში საქართველოს დელეგაცია კვლავ დააყენებს საკითხს რუსეთის მიერ ძალის გამოუყენებლობის შესახებ ვალდებულების აღების აუცილებლობაზე. ქართული დელეგაცია აღნიშნავს, რომ საქართველოს ოკუპირებულ ტერიტორიებზე უსაფრთხოების საერთაშორისო მექანიზმების ამუშავების საკითხის აუცილებლობას და მეორე სამუშაო ჯგუფის ფარგლებში კი განხილული იქნება ჰუმანიტარულ მდგომარეობასთან დაკავშრებული საკითხები.