საფრანგეთის და გერმანიის საგარეო საქმეთა მინისტრები, ლორენ ფაბიუსი და ფრანკ–ვალტერ  შტაინმაიერი, 23–25 აპრილს სამ  ქვეყანაში მათი ერთობლივი ტურნეს ფარგლებში, რომელიც ასევე მოიცავს მოლდოვასა და ტუნისში ვიზიტს, თბილისს ესტუმრებიან. ორი საგარეო საქმეთა მინისტრი თავის ერთობლივ ვიზიტს მოლდოვასა და საქართველოში მარტში გეგმავდა, თუმცა მაშინ ეს ვიზიტი უკრაინაში განვითარებული მოვლენების გამო გადაიდო. საფრანგეთის საგარეო საქმეთა სამინისტრომ განაცხადა: „ეს პირველი ერთობლივი ვიზიტი ასახავს ჩვენს საერთო განზრახვას, რომ გავაძლიეროთ თანამშრომლობა, რათა უზრუნველვყოთ, რომ ევროპული სამეზობლო იყოს სტაბილურობის, კეთილდღეობის და უსაფრთხოების რეგიონი. ამ სამ ქვეყანაში ორი მინისტრი პოლიტიკურ დისკუსიებს გამართავს ხელისუფლებასთან, ასევე ძირითადი პარტიების წარმომადგენლებთან“. „ვიზიტი მოლდოვასა და საქართველოში იმის მანიშნებელი იქნება, რომ ჩვენ მხარს ვუჭერთ, არა უგვიანეს ივნისისა, ევროკავშირსა და ამ ორ ქვეყანას შორის ასოცირების შესახებ შეთანხმებების ხელმოწერას“, – განაცხადა საფრანგეთის საგარეო საქმეთა სამინისტრომ. გერმანიის და საფრანგეთის საგარეო საქმეთა მინისტრები 24 აპრილს თავიანთ ქართველ კოლეგას მაია ფანჯიკიძეს და სხვა ოფიციალურ პირებსაც შეხვდებიან. საქართველოს საგარეო საქმეთა მინისტრის მოადგილემ დავით ზალკალიანმა განაცხადა 22 აპრილს, რომ საფრანგეთის და გერმანიის საგარეო საქმეთა მინისტრების ერთობლივი ვიზიტი განსაკუთრებით მნიშვნელოვანია ევროკავშირთან ასოცირების შესახებ შეთანხმების ხელმოწერის და ასევე სექტემბერში ნატოს უელსის სამიტის წინ. „ეს ვიზიტი კიდევ ერთი მხარდაჭერა გახლავთ იმ კურსისა და იმ გეზისა, რომელიც საქართველოს ძალიან მტკიცედ აქვს აღებული და ეს გახლავთ ჩვენი ევროატლანტიკური ინტეგრაცია“, – განაცხადა ზალკალიანმა.