რუსეთის თავდაცვის სამინისტრო იუწყება, რომ რუსეთის სამხედრო ძალები გაყვანილია უკრაინის საზღვრიდან და სამხედროები მუდმივი დისლოკაციის ადგილებს დაუბრუნდნენ. თავდაცვის უწყების მონაცემებით, 21 მაისს როსტოვის, ბელგოროდისა და ბრიანსკის ოლქებიდან გაიგზავნა ოთხი სარკინიგზო ეშელონი და 15 თვითმფრინავი „ილ-76“, იმ სამხედროებთან ერთად, რომლებიც მონაწილეობდნენ გეგმიურ სამხედრო წვრთნაში. რუსეთის თავდაცვის სამინისტროს ცნობით, მარშრუტი, რომლითაც ჯარისკაცები და სამხედრო ტექნიკა სარკინიგზო სადგურებამდე და აეროდრომებამდე უნდა მივიდნენ, ისეა დაგეგმილი, რომ მაქსიმალურად განიტვირთოს საერთო სარგებლობის საავტომობილო გზები. „მარშრუტების ძირითად ნაწილს ჯარი გაივლის სარკინიგზო ეშელონებისა და სამხედრო-სატრანსპორტო ავიაციის თვითმფრინავებით. 1 ივნისს ქვედანაყოფები მუდმივი დისლოკაციის ადგილებში შეუდგებიან საზაფხულო სწავლებას“, - იუწყება რუსეთის თავდაცვის საქმეთა სამინისტრო.