ევროპის საბჭოს ადგილობრივ და რეგიონულ ხელისუფლებათა კონგრესის დელეგაცია საქართველოში 2014 წლის 15 ივნისს დაგეგმილ თვითმმართველობის არჩევნებს დააკვირდება. დელეგაციას ჯოს ვინენი (ნიდერლანდები, ევროპის სახალხო პარტია) უხელმძღვანელებს. დელეგაცია 22 წევრისაგან შედგება, რომელთა შორის არიან წევრები ევროპის კავშირის რეგიონთა კომიტეტიდან. ევროსაბჭოს წარმომადგენლობის განცხადებით, 28-29 მაისს შედგა კონგრესის წევრთა წინასაარჩევნო ვიზიტი, რათა შეეფასებინათ საარჩევნო გარემო და არჩევნებისთვის მზადების პროცესი. არჩევნების დღესთან მიმართებით, კონგრესის დელეგაციის მეთაურმა ჯოს ვინენმა საქართველოს მთავრობას მოუწოდა, გააკეთოს ყველაფერი, რათა არჩევნებამდე დარჩენილი დღეების განმავლობაში უზრუნველყოს სამართლიანი კამპანია მშვიდობიან და დემოკრატიულ გარემოში. "მე ყურადღება მივაქციე მთავრობის დაპირებას, რომ ჩატარდეს უმაღლესი დემოკრატიული სტანდარტის არჩევნები, რათა დაიგმოს ნებისმიერი ფორმის ძალადობა და თითოეულ კანონდარღვევას მოჰყვეს სათანადო რეაგირება. საარჩევნო კამპანიის პროცესში პოლიტიკურ პარტიებსა და კანდიდატებს შორის კონკურენცია შეიძლება იყოს წინააღმდეგობრივი, მაგრამ არასოდეს უნდა ახლდეს დამამცირებელი თუ სიძულვილით აღსავსე დისკურსი ან ქცევა. ხელისუფლების შტოების ურთიერთკონტროლისა და დაბალანსების სისტემა არის მოწიფული დემოკრატიული გარემოს მთავარი წინაპირობა, რომელშიც მთავრობასაც და ოპოზიციასაც თავისი როლი აქვს და ორივე პასუხისმგებლობით ეკიდება მათ, ვინც გადაწყვეტილებას იღებს არჩევნების დღეს - ხალხს", - განაცხადა ვინენმა. ამასთან, ევროსაბჭოს წარმომადგენლობის ინფორმაციით, 12 და 13 ივნისს დელეგაციის წევრები საქართველოში ვიზიტის ფარგლებში შეხვდებიან მთავრობის წარმომადგენლებს, მათ შორის, იუსტიციის მინისტრს და თავისუფალი და სამართლიანი არჩევნებისათვის უწყებათაშორისი კომისიის თავმჯდომარე თეა წულუკიანს. ასევე, საქართველოს რეგიონული განვითარებისა და ინფრასტრუქტურის სამინისტროს წარმომადგენლებს. აღნიშნული კონგრესის დელეგაცია ასევე შეხვდება ცენტრალური საარჩევნო კომისიის წევრებს, სახელმწიფო სერვისების განვითარების სააგენტოსა და სახელმწიფო აუდიტის სამსახურის წარმომადგენლებს. ევროსაბჭოს წარმომადგენლობის ინფორმაციით, შეხედულებების გაზიარების მიზნით შეხვედრები იგეგმება თბილისის მერობის კანდიდატებთანაც, ასევე კონგრესის საქართველოს დელეგაციის წევრებსა და საქართველოს ადგილობრივ თვითმმართველობათა ეროვნულ ასოციაციასთან. აგრეთვე დელეგაცია შეხვდება დიპლომატიური კორპუსის, საერთაშორისო და ქართული სამოქალაქო საზოგადოებისა და მედიის წარმომადგენლებს. 14 ივნისს დელეგაციის წევრები ქვეყნის სხვადასხვა რეგიონში შეხვდებიან ადგილობრივი არასამთავრობო ორგანიზაციების წარმომადგენლებსა და ადგილობრივ გრძელვადიან დამკვირველვებს, რათა მოემზადნონ 15 ივნისის არჩევნებზე დასაკვირვებლად. ევროსაბჭოს წარმომადგენლობის განცხადებით, სასტუმრო "ქორთიარდ მერიოტში" 16 ივნისს, 11:30 საათზე დაგეგმილია პრესკონფერენცია, სადაც დელეგაცია თვითმმართველობის არჩევნებთან დაკავშირებით, წინასწარ დასკვნებს წარმოადგენს.