უმორჩილესი თხოვნით მივმართავ ყველა იმ ოჯახს, რომელმაც სახელმწიფოს ხელით, წინა მმართველობის პერიოდში დაკარგა ოჯახის წევრი, დაელოდონ გამოძიების შედეგებს , - ამის შესახებ საქართველოს იუსტიციის მინისტრმა, თავისუფალი და სამართლიანი არჩევნებისთვის უწყებათაშორისი კომისიის თავმჯდომარემ თეა წულუკიანმა დღეს გამართულ ბრიფინგზე განაცხადა. თეა წულუკიანი მოუწოდებს ამ ოჯახებს, რომ ნუ განახორციელებენ აგრესიას. "მივმართავ უმორჩილესი თხოვნით ყველა იმ ოჯახს, რომელმაც სახელმწიფოს ხელით დაკარგა შვილი, დაკარგა ძმა, წინა მთავრობის მმართველობის პერიოდში და თანაც ზოგმა ისე, რომ დღესაც ვერ ეღირსა ცხედრის პოვნას, დაელოდონ დაწყებული გამოძიების შედეგებს და ნუ განახორციელებენ თავად აგრესიას, რამაც უარესი შედეგი შეიძლება მოიტანოს მათთვის", - განაცხადა წულუკიანმა. რამდენიმე დღის წინ ლევან ქარდავასა და დავით ცინდელიანის ოჯახებმა რამდენჯერმე მოაწყვეს საპროტესტო აქცია ზუგდიდში, "ნაციონალური მოძრაობის" ოფისთან, რაც დაპირისპირებაში გადაიზარდა. ცინდელიანისა და ქარდავას გაუჩინარების საქმის გახსნაზე განცხადებები შს სამინისტროში გაკეთდა. მათ მკვლელობაში კუდ-ის ყოფილი მაღალჩინოსანი, რომან შამათავაა ბრალდებული.