ამერიკელი დიპლომატის ჯონ ტეფტის რუსეთში აშშ-ის ელჩად დანიშვნის თაობაზე რუსეთის მხარემ თანხმობა განაცხადა. ამის შესახებ "იტარ-ტასი" დიპლომატიურ წყაროზე დაყრდნობით იუწყება. "რუსეთმა აგრემანი მისცა ჯონ ტეფტის მოსკოვში, აშშ-ის დიპწარმომადგენლობის ახალ ხელმძღვანელად დანიშვნის თაობაზე", - ციტირებს რუსული სააგენტო დიპლომატის კომენტარს. ამასთან, "იტარ-ტასი" ცნობით, როგორც "ნიუ-იორკ თაიმსმა" დაწერა, მაიკლ მაკფოლის შემცვლელად ჯონ ტეფტის დასახელებამ თავდაპირველად ეჭვები გამოიწვია, რადგან არსებობდა საშიშროება, რომ ტეფტის სამუშაო გამოცდილება ყოფილ საბჭოთა რესპუბლიკებში რუსეთს აღიზიანებს. ამასთან, ჯონ ტეფტის რუსეთში აშშ-ის ელჩად დანიშვნაზე თანხმობის შესახებ აშშ-მა რუსეთს ივნისის ბოლოს მიმართა. 65 წლის ჯონ ტეფტი უკვე მუშაობდა რუსეთში აშშ-ის საელჩოში 1996-1999 წლებში. 2005-2009 წლებში ამერიკელი დიპლომატი საქართველოში აშშ-ის ელჩი იყო, რის შემდეგაც მუშაობა უკრაინაში გააგრძელა. 2013 წლიდან ჯონ ტეფტი პენსიაზეა გასული, თუმცა ეს ხელს არ უშლის მის ელჩად დანიშვნას.