ევროპის ადამიანის უფლებათა სასამართლომ საქმეზე “აშლარბა საქართველოს წინააღმდეგ”, საქართველოს სასარგებლო გადაწყვეტილება გამოიტანა და დაადგინა, რომ ორგანიზებულ დანაშაულთან ბრძოლისათვის საქართველოს კანონმდებლობით განსაზღვრული მექანიზმები ევროპულ კონვენციას არ არღვევს. ქურდული სამყაროს წევრობის ბრალდებით იზეთ აშლარბა 2007 წლის 27 მარტს დააკავეს. ბრალდება აცხადებდა, რომ ის ე.წ. კანონიერი ქურდებისგან მითითებებს იღებდა, მონაწილეობადა ე.წ. “ობშიაკის” მოგროვებაში და სარგებლობდა კრიმინალური ავტორიტეტის სახელით. აშლარბას ბრალი დაუმტკიცდა, ის დამნაშავედ იქნა ცნობილი საქართველოს სისხლის სამართის კოდექსის 223(1) მუხლით, რაც ქურდული სამყაროს წევრობას, კანონიერ ქურდობას გულისხმობს. აშლარბას 7 წლით თავისუფლების აღკვეთა მიესაჯა. ევროპის ადამიანის უფლებათა სასამართლომ დაადგინა, რომ საქართველოს იზით აშლარბას წინააღმდეგ კანონი არ დაურღვევია. სასამართლოს გადაწყვეტილებაში აღნიშნულია, რომ 223(1) მუხლი, რომლითაც ის გაასამართლეს, არის ნაწილი საკანონმდებლო პაკეტისა, რომელიც ორგანიზებული დანაშაულის წინააღმდეგ ბრძოლისისკენაა მიმართული. სასამართლომ აღნიშნა, რომ “ქურდული სამყარო” მხოლოდ საქართველოს ციხეებს არ ეხებოდა და საზოგადოებაში იყო გავრცელებული, რაც განსაკუთრებით საშიშია ქვეყანაში მცხოვრები ახალგაზრდებისთვის, ამიტომ, მან საქმეზე “აშლარბა საქართველოს წინააღმდეგ” საქართველოს სასარგებლო გადაწყვეტილება მიიღო.