საპარლამენტო უმცირესობის ერთ-ერთი ლიდერის გიორგი კანდელაკის ცემის ფაქტზე გამოძიება დაიწყო. როგორც შინაგან საქმეთა სამინისტროში განაცხადეს, გამოძიება 125-ე მუხლით მიმდინარეობს, რაც პირის ცემას გულისხმობს. რაც შეეხება თავად კანდელაკს, პარტიის პრესსამსახურის ინფორმაციით, გიორგი კანდელაკს გუშინ თავს დაესხნენ. შემთხვევა წურწუმიას ქუჩაზე მოხდა. "გიორგი კანდელაკი პარტიის ოფისიდან სახლში მიდიოდა, როცა წურწუმიას ქუჩაზე გზა მანქანამ გადაუჭრა, რის შემდეგაც მანქანიდან ერთი პირი გადმოვიდა და მას ფიზიკური შეურაცხყოფა მიაყენა", - აღნიშნეს პარტიაში. მათივე ინფორმაციით, თავდამსხმელი "ქართული ოცნების" აქტივისტი და თეთრიწყაროს მუნიციპალიტეტის თანამშრომელი ალექსი მელაძეა. "ნაციონალური მოძრაობის" განმარტებით, კანდელაკს დაზიანება თავის არეში აქვს მიყენებული, თუმცა მისი ჰოსპიტალიზაცია საჭირო არ გახდა. მომხდართან დაკავშირებით გიორგი კანდელაკი უკვე დაკითხეს.