სოფელ მოხეში მომხდარი ინციდენტის დროს დაკავებული ახალგაზრდები გაათავისუფლეს. ახალციხის რაიონული სასამართლოს გადაწყვეტილებით, 11 მათგანს, ადმინისტრაციული სასჯელის სახით,250 ლარი დაეკისრა, სამი ახალგაზრდა კი სასამართლო დაბრაზიდან ჯარიმის გარეშე გაათავისუფლეს. გაასაჩივრებენ თუ არა სასამართლოს გადაწყვეტილებას გათავისუფლებულები, ჯერ უცნობია. მათი განცხადებით, ჯარიმის ოდენობა დიდია და ისინი აღნიშნული თანხის გადახდას ვერ შეძლებენ. პროცესის პარალელურად, სასამართლოს შენობის წინ საპროტესტო აქცია მიმდინარეობდა. მუსლიმი მოსახლეობა დაკავებულების გათავისუფლებას ითხოვდა. ადიგენის რაიონის სოფელ მოხეს მუსლიმი მოსახლეობის მოთხოვნა კვლავ უცვლელია. ადგილობრივების განცხადებით, სოფლის ცენტრში მდებარე შენობაში, რომელშიც წლების წინ მეჩეთი ფუნქციონირებდა, კულტურის ცენტრის განთავსებას არ დაუშვებენ და მოთხოვნის დაუკმაყოფილებლობის შემთხვევაში, პერმანენტულ აქციებს გამართავენ. სამცხე-ჯავახეთის მუფთი მამუკა ვაშაყმაძე ცენტრალურ ხელისუფლებას მიმართავს და აცხადებს, რომ ადგილობრივი ხელისუფლება მუსლიმი მოსახლეობის პოზიციას არ ითვალისწინებს. მისივე თქმით, სოფლის ცენტრში მდებარე შენობის დემონტაჟი უნდა შეჩერდეს.