"ფაიზერის“ დოზები, რომელიც ჯერ ვაქცინაციის ცენტრებში გადანაწილდება და ვაქცინაციის პროცესი შემდეგ განახლდება, საქართველოში დღეს ჩამოვიდა. ამის შესახებ ჯანდაცვის მინისტრის მოადგილემ თამარ გაბუნიამ განაცხადა.

მისი თქმით, არსებული ვაქცინების რაოდენობა ზაფხულის შუა რიცხვებამდე აცრის მაჩვენებლის სამიზნე ნიშნულზე - 65%-ზე ასასვლელად საკმარისია. როგორც გაბუნია ამბობს, წლის განმავლობაში ჯამში „ფაიზერის“ ერთი მილიონი დოზა უნდა შემოვიდეს.

„ფაიზერის“ ვაქცინების დამატებითი დოზები ამ დილით ჩამოვიდა, მალევე გადანაწილდება და  „ფაიზერით“ ვაქცინაციის პროცესი განახლდება. „სინოფარმით“ და „სინოვაკით“ ვაქცინაცია მიმდინარეობს, ვაქცინის რაოდენობა საკმარისია იმისთვის, რომ მივაღწიოთ ჩვენს სამიზნე მაჩვენებელს- 65%-ს ზაფხულის შუა რიცხვებამდე, მთელი მოსახლეობის. ამდენად, ვაქცინების მომარაგების ჯაჭვი კვლავაც გაგრძელდება უწყვეტად და ამ მხრივ მოსახლეობას პრობლემა არ შეექმნება. მთავარია, გადაწყვეტილება დროული იყოს და მოქალაქე მოვიდეს იმისთვის, რომ „ბუსტერ“ დოზა მიიღოს, რადგან „ბუსტერ“ დოზის მნიშვნელობა კვლავაც მაღალია. ასევე, თუ ჯერ მან კიდევ არ ჩაიტარა ვაქცინაცია, ისევ და ისევ პირველი და მეორე დოზა. წახალისების ფინანსური პროგრამა აპრილის ბოლომდე ისევ გრძელდება. 200 ლარი პირველ და მეორე აცრაზე, შემდეგ კი 100 ლარი „ბუსტერ“ დოზაზე.

ერთი მილიონი „ფაიზერი“ გვაქვს შესყიდული, რომელიც წლის განმავლობაში ეტაპობრივად შემოვა. ახლა, პირველი შემოტანა 25%-ია ამ დოზებს, შემდეგ კი ეტაპობრივად კიდევ მოხდება შემოტანა იმგვარად, რომ ჯაჭვი სრულად იყოს უზრუნველყოფილი“,- განაცხადა თამარ გაბუნიამ.

გარდა ამისა, მინისტრის მოადგილე განმარტავს, რომ 5-დან 12 წლამდე ასაკობრივ კატეგორიაში განსხვავებული ვაქცინაა რეკომენდირებული, რომელიც მოგვიანებით შემოვა.

"დღევანდელი პირობით ვაქცინაციის ასაკი არის 12 წლის ზემოთ. ხუთიდან თორმეტ წლამდე ასაკობრივ ჯგუფში რეკომენდირებულია განსხვავებული ვაქცინა. ამ ვაქცინის მოწოდება შედარებით მოგვიანებით იგეგმება იმიტომ, რომ ამ ტიპის ვაქცინაზე მოთხოვნა არის. განსაკუთრებით ქრონიკული დაავადებების მქონე ბავშვებისთვის და გარკვეული რაოდენობა ამ ვაქცინის მოწოდებაც მოხდება“,- აღნიშნა გაბუნიამ.