საქართველოს მთავრობამ სხვადასხვა დაწესებულებაში შეჭრილი მოქალაქეების პრობლემების გადაჭრის სამოქმედო გეგმა დაამტკიცა.გეგმა სხვადასხვა დაწესებულებაში შეჭრილი ყველა სოციალურად დაუცველი ადამიანის აღწერას და მათ მიერ სპეციალური კითხვარის შევსებას ითვალისწინებს. ამის შესახებ ჟურნალისტებს ჯანდაცვის მინისტრმა დავით სერგენკომ განუცხადა. "სოციალურად დაუცველი მოსახლეობის იმ ნაწილთან მიმართებაში, რომლებიც დღეის მდგომარეობით სხვადასხვა დაწესებულებაშია შეჭრილი, შემუშავებულ იქნა სამოქმედო გეგმა და დღეს ის დავამტკიცეთ. უკვე დაწყებულია მისი განხორციელება. გუშინ ღამის მდგომარეობით სხვადასხვა ობიექტზე შეჭრილი ადამიანების რაოდენობა 1 660 შეადგენს. ყველა მათგანთან სოციალური აგენტები მივლენ. მოახდენენ მათ აღწერას და კითვხარების შევსებას. კითხვარები, გარდა იმ ინფორმაციისა, რაც სოციალურად დაუცველ ადმიანთა მონაცემთა ბაზაში უკვე არსებობს, მოგვცემს დამატებითი ინფორმაციის მიღების საშუალებას, რათა მოხდეს დიფერენცირება, რამდენია რეალურად ღარიბი და რამდენი –ხელოვნურად მიკედლებული. სამწუხაროდ, ასეთი არც თუ ისე ცოტაა. ამასთან, ანკეტირება საშუალებას მოგვცემს, მივიღოთ დამატებითი ინფორმაცია იმასთან დაკავშირებითაც, თუ რითი შეიძლება მათ დამატემით დავეხმაროთ, იქნება ეს ჯანმრთელობის პრობლემები თუ სხვა პრობლემები. გარდა ამისა, ეს მეთოდი საშუალებას მოგვცემს, გავარკვიოთ სოციალურად დაუცველ ოჯახებში არსებობს თუ არა ერთი ადამიანი მაინც, რომელიც შრომის უნარიანია, რათა მათ დასაქმება შევთავაზოთ. ყველაზე მთავარი ამოცანა კი გახლავთ ის, რომ გამოვყოთ ბიუჯეტი, რათა ყველაზე გაჭირვებული ოჯახების ბინის ქირით დაკმაყოფილება დავიწყოთ", - აცხადებს სერგენკო. მისივე ინფორმაციიმ იმ 50 ობიექტიდან რომელშიც სოციალურად დაუცველი მოქალაქეები არიან შეჭრილნი, 16 ობიექტზე სოციალური აგენტები უკვე შევიდნენ და აღნიშნული კატეგორიის ადამიანების ინტენსიური ანკეტირება მიმდინარეობს. "მათი მხრიდან ძირითადად სოციალურ აგენტებთან აქტიური თანამშრომლობის სურვილი მჟღავნდება. ჩვენი გათვლებით, ამ სამუშაოების დასრულებას მიმდინარე კალენდარული კვირის ბოლოს შევძლებთ. ამის შემდეგ კი, 4-5 დღე დაგვჭირდება მონაცემების დამუშავებისთვის და უკვე ვფიქრობთ, რომ მომავალი კვირის მეორე ნაწილისთვის შეგვიძლია ყველაზე გაჭირვებული ოჯახების ბინის ქირით უზრუნველყოფა. მათი ჯანმრთელობის პრობლემების მოგვარება დავიწყოთ და ასევე უახლოეს მომავალში უზრუნველვყოთ მათი დასაქმება, ვისაც შრომის უნარი შესწევთ", - აღნიშნა მინისტრმა.