სამეგრელო-ზემო სვანეთის გუბერნატორმა ლევან შონიამ ახალი მოადგილეები წარადგინა. გუბერნატორის მოადგილეები იქნებიან კობა ქანთარია და ხვიჩა ჯიშკარიანი. „ერთი რამ მინდა ყველას აუხსნა, არ აქვს მნიშვნელობა ვისზე გავაკეთებ აქცენტს, ჩემთვის მთავარია შრომისუნარიანობა და ერთგულება, ერთგულება რეგიონის მიმართ. მე მჭირდება მათი მუშაობის ხარისხი, რას გააკეთებენ და რას შემოგვთავაზებენ. ასევე კომუნიკაცია უნდა ჰქონდეთ მოსასახლეობასთან და მედიასთან“, - განაცხადა დღეს სამხარეო ადმინისტრაციაში გამართულ ბრიფინგზე ლევან შონიამ. რაც შეეხება გუბერნატორის მესამე მოადგილეს, მესტიის მუნიციპალიტეში, შონიას განმარტებით, გადაწყვეტილება ჯერ არ არის მიღებული. მისვე თქმით, ასევე ჯერ არ იგეგმება სხვა საკადრო ცვლილებები. ახალი მოადგილეების განმარტებით, მათი პრიორიტეტი სამუშაო ადგილების შექმნა და ინვესტიციების მოზიდვა იქნება. მათივე განცხადებით, ისინი 24 საათიან რეჯიმში იმუშავებენ. ცნობისთვის, კობა ქანთარია დღემდე საქართველოს გაერთიანებული წყალმომარაგების კომპანიის სამეგრელო-ზემო სვანეთის რეგიონალური მენეჯერის თანამდებობაზე მუშაობდა, ხოლო ხვიჩა ჯიშკარიანი კოალიცია „ქართული ოცნების“ სამეგრელო–ზემო სვანეთის რეგიონის კოორდინატორი იყო. ამასთან, ჯიშკარიანი  ძალოვან სტრუქტურებში სხვადსხვა დროს მაღალ თანამდებობებზეც მუშაობდა.