„მცირემიწიან ფერმერთა 2014 წლის საგაზაფხულო სამუშაოების  ხელშეწყობის პროექტს“ სამეგრელო -ზემო სვანეთის გუბერნატორი და მუნიციპალიტეტის გამგებლები სოფლის მეურნეობის მინისტრისგან შალვა ფიფიასგან დღეს, 4 თებერვალს  გაეცნენ. აღნიშნული პროექტის ფარგლებში სამეგრელო-ზემო სვანეთის რეგიონში დახმარებას 97 ათას 579  ფერმერი მიიღებს. საერთო ჯამში კი საქართველოს ტერიტორიაზე წინასაგაზაფხულო სამუშაოების ხელშეწყობის პროგრამით  800 ათასამდე მცირემიწიანი ფერმერი ისარგებლებს. 2014 წელს აღნიშნული პროექტის ბენეფიციარები ის ფერმერები იქნებიან, რომელთაც საკუთრებაში, სარგებლობაში ან ფაქტობრივ მფლობელობაში 1.25 -ის ჩათვლით ჰექტრის ფართობის  სასოფლო-სამეურნეო დანიშნულების მიწის ნაკვეთები გააჩნიათ, რომელთაც  ერთწლიანი და მრავალწლიანი  კულტურების წარმოებისთვის იყენებენ. ამავე დროს, ფერმერების საკუთრებაში, სარგებლობაში ან ფაქტობრივ მფლობელობაში არსებული სასოფლო-სამეურნეო დანიშნულების მიწის ნაკვეთების ჯამური ფართობი არ უნდა აღემატებოდეს  5 ჰა-ს. ფერმერები, მიწის ფართობის მიხედვით, დაიყოფიან ორ კატეგორიად და ისინი მიიღებენ სხვადასხვა ოდენობის სარგებელს.  ფერმერები, რომელთაც გააჩნიათ 0,25 ჰა–მდე ფართობის მიწის ნაკვეთი  და ფერმერები, რომელთაც გააჩნიათ 0,25 ჰა დან 1,25 ჰა-ის ჩათვლით ფართობის მიწის ნაკვეთები. 2014 წელს გადაწყდა, რომ  ბენეფიციარებმა პროექტის ფარგლებში  სარგებელი მიიღონ ორი გზით: ნიადაგის ხვნის სამუშაოებისათვის მიიღონ სასოფლო–სამეურნეო ბარათი (ხვნის ბარათი, 2013 წლის პროექტით გათვალისწინებულის ანალოგიური), ხოლო სასოფლო-სამეურნეო საქონლის მისაღებად მათ დაურიგდეთ საბანკო ბარათი, ე.წ. „აგრო ბარათი“. „მცირემიწიან ფერმერთა საგაზაფხულო სამუშაოების ხელშეწყობის პროექტი“  1 თებერვალს დაიწყო და მიმდინარე წლის აგვისტოში დასრულდება.