წალენჯიხის მუნიციპალიტეტის ტერიტორიული ერთეულის,  ქალაქი ჯვარის გამოყოფას და ცალკე თვითმმართველი ერთეულის შექმნას  ითხოვენ.  პეტიციას, როგორც მისი ერთ-ერთი ხელმომწერი და საკრებულოს წევრი დავით ჭიჭინაძე აცხადებს,  12 ათასამდე მოქალაქე აწერს ხელს. აღნიშნული პეტიციით,  ჯვარის მოსახლეობამ საქართველოს მთავრობას გასული წლის ნოემბერში მიმართა. ჭიჭინაძის განმარტებით, ქალაქ ჯვარს, ცალკე მუნიციპალიტეტად ჩამოყალიბებისთვის, საჭირო ინფრასტუქტურა გააჩნია და მისივე თქმით, აქედან გამომდინარე  2014 წლის თვითმმართველობის არჩევნებამდე, გადაწყვეტილების მიღება მარტივია. „თვითმმართველობის ახალი კოდექსის განხილვისას, მე როგორც ზემოაღნიშნულის ერთ-ერთმა ინიციატორმა, პეტიციის შესახებ კიდევ ერთხელ შევახსენე პარლამენტის შესაბამის კომიტეტს, ანუ გარკვეული ადვოკატირება გავაგრძელე თემის გადასაწყვეტად. ამის შემდეგ იყო მოკლე შეხვედრა და გარკვეული შეთანხმება პრემიერთან, ასევე საკმაოდ ინტენსიური მუშაობა მიმდინარეობდა რეგიონული განვითარებისა და   ფინანსთა სამინისტროში, რომ ამ  საკითხის დეტალები დამუშავებულიყო“, - აცხადებს დავით ჭიჭინაძე. მისივე განმარტებით, როგორც ახალი, ასევე,  ძველი  თვითმმართველობის კოდექსი  ქმნიდა ისეთ სამართლებრივ ჩარჩოებს, რომ ქალაქი ჯვარი და მსგავსი დასახლებები ცალკე მუნიციპალიტეტად ჩამოყალიბებულიყვნენ. „2009 წელსაც  იყო  ამ საკითხის ფორმალიზების მცდელობა, თუმცა რიგი  „უხერხულობის“ გამო, მაშინდელი ხელიუფლების, ეს ინიციატივა ზოგიერთ აქტიურ მოქალაქეს ცუდად და მწარედ დაუმთავრდა“, - უთხრა რადიო „ათინათს“ დავით ჭიჭინაძემ, თუმცა ამასთან დაკავშირებით, მან დეტალებზე საუბარი არ ისურვა. როგორც დავით ჭიჭინაძე განმარტავს, იმ შემთხვევაში თუ მათი მოთხოვნა გათვალისწინებული იქნება „ჯვარის მუნიციპალიტეტში“  ენგურის ხეობის 9 თემი  (ლია, ფახულანი, ჭალე, ეწერი, ჩქვალერი, მუჟავა) შევა. ამასთან, მისივე თქმით, ჯვარის ტერიტორიაზე დარჩება ენგურჰესის საწარმოების ის ნაწილი, რომელიც, ეკონომიურ დოვლათს ქმნის.