ფეხზე მდგომი მგზავრების გადაყვანის გამო მიკროავტობუსის მძღოლების დაჯარიმება ზუგდიდშიც დაიწყო. სამარშუტო ტაქსის მძღოლები აღნიშნულის გამო უკმაყოფილებას გამოთქვამენ და აცხადებენ, რომ თუ დაჯარიმებები გაგრძელდება ისინი გაიფიცებიან. როგორც მძღოლები განმარტავენ, მათ არამარტო საპატრულო პოლიცია, არამედ სამეგრელო-ზემო სვანეთის სამხარეო პოლიციის თანამშრომლებიც აჯარიმებენ. „სამი მგზავრი იდგა ფეხზე და 100 ლარით დამაჯარიმეს. სოფლიდან, რომ მოდის მარშუტკა მაგის უფლება უნდა ჰქონდეს ფეხზე დააყენოს რამდენიმე მგზავრი. თუ დარჩა ორი კაცი როგორ უნდა წავიდეს ის სოფელში ტაქსით, როცა ის 4-5 ლარის გამო მოდის ბაზარში“, - ამბობს სამარშუტო ტაქსის მძღოლი რევაზ ჭკადუა. სამარშუტო ტაქსის მძღოლებს საპატრულო და სამხარეო პოლიციის მიმართ სხვა პრეტენზიებიც აქვთ და აცხადებენ, რომ პოლიციელები მძღოლებს ავიწროებენ. „სპეციალურად, 30 კმ/სთ სიჩქარით მიდის პატრულის მანქანა, წინ ჩაგიდგება და გიქმნიან ისეთ სიტუაციას, რომ გაუსწრო პატრულს. ეს იმას ნიშნავს, რომ თუ გაუსწრებ გიწერენ ჯარიმას“, -უთხრა რადიო „ათინათს“ მერაბ გუჩუამ. ზუგდიდის მუნიციპალიტეტის გამგეობის ტრანსპორტის რეგულირების განყოფილების უფროსმა მურთაზ ქანთარიამ რადიო „ათინათთან“  საუბარში აღნიშნა, რომ აქამდე ზუგდიდში ფეხზე მდგომი მგზავრის გადაყვანას ყურადღება არ ექცეოდა და არ ფლობს ინფორმაცაის , თუ რამ გამოიწვია მძღოლების დაჯარიმების დაწყება. „ფეხზე მდგომი მგზავრის გადაყვანას ყურადღება იმიტომ არ ექცეოდა , რომ აქ გათვალისწინებული იყო სხვადასხვა ფაქტორები, სოციალური კუთხე, საზღვრისპირა  სოფლების სიახლოვე და ა.შ. თუ მიკროავტობუსის მძღოლები ოფიციალურად მოგმართავენ,  ჩვენ შესაბამის უწყებასთან შუამდგომლობას გავუწევთ“, - აცხადებს  მურთაზ ქანთარია. მიკროავტობუსის მძღოლების დაჯარიმებას ზუგდიდში მგზავრები არაერთგვაროვნად აფასებენ. ზოგი მათგანი ფიქრობს, რომ ეს სამართლიანი გადაწყვეტილებაა და ადამიანი ფეხზე მდგომი არ უნდა მგზავრობდეს. ზოგი კი, განსაკუთრებით სოფლის სამარშუტო ტაქსის მგზავრები ამბობენ, რომ ზოგჯერ, დროის სიმცირის გამო ურჩევნიათ ფეხზე მდგომებმა იმგზავრონ ვიდრე, მომდევნო რეისს დაელოდონ. ამასთან მგზავრები შიშობენ, რომ ახალი რეგულაციები მგზავრობის საფასურის გაზრდას გამოიწვევს. ცნობისთვის, პარლამენტის დადგენილების თანახმად მიკროავტობუსის მძღოლებს ფეხზე მდგომი მგზავრების გადაყვანა ეკრძალებათ. ჯარიმის ოდენობა კი 100 ლარითაა განსაზღვრული. პარლამენტმა აღნიშნული დადგენილება გასული წლის ნოემერში მიიღო, მანამდე კი ჯარიმის მოცულობა 30 ლარს შეადგენდა.