„სამეგრელოს ხმის“ ლიდერი თენგიზ ჯგუშია  ზუგდიდის მუნიციპალიტეტის სოფლებში სასმელი წყლის მილების ამოღების საქმეზე  გ.ყ. - სა და  კ. მ. დაკავებას  გამოეხმაურა. ჯგუშიას განცხადებით, წყლის მილების ამოღების საქმეზე დაკავებული ორი პირი მხოლოდ შემსრულებელია და მილების ამოღება, უშუალოდ პოლიციის მაღალჩინოსნების მიერ იყო ორგანიზებული.  „ეს დანაშაული ვერ მოხდებოდა პოლიციის მონაწილეობის გარეშე. სამეგრელო-ზემო სვანეთის ამჟამინდელი გუბერნატორი, ლევან შონია იმ დროს  პოლიციის უფროსი იყო,  მან უნდა გასცეს პასუხი, ერთი თვის განმალობაში რატომ ვერ ხედავდა პოლიცია მილების დემონტაჟს და რატომ არ არის არც ერთი მაღალჩინოსანი პასუხისგებაში მიცემული?!“ - აღნიშნა შეხვედრაზე  ჯგუშიამ. აქვე ჯგუშია, ლალი ანთიას დაკავებას შეეხო და აღნიშნა რომ მისი დაკავება მილების საქმეზე განრიდება და ხალხისთვის თვალის ახვევა  იყო, რადგან მისივე თქმით, „ანთია დენთით და კომპრომანტებით სავსე კასრია, რომლის აფეთქებაც ბევრი ადამინის პასუხისგებაში მიცემას ნიშნავს“. სამეგრელოს ხმის ლიდერის მიერ გამართულ შეხვედრაზე რიყის და ტყაიის მოსახლეობაც იმყოფებოდა. მათ მედიასთან საუბარში განმარტეს, რომ თენგიზ ჯგუშიასთან ერთად განცხადებით მიმართეს საოლქო პროკურორს, დაზარალებულ მოსახლეობასთან შეხვედრის მოთხოვნით, თუმცა მათგან პასუხი ამ დრომდე არ მიუღიათ. დაზარალებულები  აქვე დასძენენ  რომ იმ შემთხვევაში თუ მილების საქმე არ მოგვარდება და ზარალი არ აუნაზღაურდებათ მასშტაბურ საპროტესტო აქციებს გამართავენ. აღნიშნულთან დაკავშირებით რადიო „ათინათი“  გუბერნატორ ლევან შონიას დაუკავშირდა. „ჯგუშიას ნათქვამთან დაკავშირებით კომენტარს არ ვაკეთებ, თემას სამართალდამცავები იძიებენ, ეს მათი პრეროგატივაა და დაველოდოთ მოვლენების განვითარებას“-განაცხადა გუბერნატორმა რადიო „ ათინათთან“ საუბარში.