კოალიციურ  პროექტ „გამჭვირვალე თვითმმართველობის“ ფარგლებში არასამთავრობო ორგანიზაციებსა და ზუგდიდის საკრებულოს შორის სამუშაო შეხვედრა გაიმართა. შეხვედრა საკრებულოს სხდომათა დარბაზში შედგა. არასამთავრობოების წარმომადგენლების განცხადებით, პროექტის მიზანია საკრებულოს წევრების ანგარიშვალდებულებების გაზრდა ამომრჩევლების მიმართ. ამასთან, პროექტის თანახმად, დეპუტატებმა პერიოდულად უნდა  შეადგინონ  ანგარიში, სადაც მათი საქმიანობა დეტალურად იქნება ასახული. არასამთავრობო ორგანიზაციებსა და ზუგდიდის საკრებულოს შორის ურთიერთთანამშრომლობის მემორანდუმი, სავარაუდოდ, უახლოეს ერთ კვირაში გაფორმდება. „კარგია ასეთი ინიციატივა, რომ მოდის არასამთავრობო ორგანიზაციების მხრიდან. ეს მნიშვნელოვნად შეუწყობს ხელს დეპუტატის პასუხისმგებლობის საკითხს. თუმცა ჩვენი მხრიდან  იყო შენიშვნები, რომელიც არასამთავრობოების მხრიდანაც იმედია იქნება გათვალისწინებული და ვფიქრობ ურთიერთთანამშრომლობის მემურანდუმი უახლოეს მომავალში გაფორმდება“, -აცხადებს ზუგდიდის საკრებულოს აპარატის უფროსი თეიმურაზ ბასილაია. კოალიციურ პროექტ - „გამჭვირვალე თვითმმართველობას“ რამდენიმე არასამთავრობო ორგანიზაცია ერთობლივად  ახორციელებს. მათ შორის ასოციაცია „ათინათი“, ახალგაზრდა იურისტთა ასოციაცია (საია), ახალგაზრდა ეკონომისტთა ასოციაცია, სიდა, და ა.შ. პროექტი აღმოსავლეთ-დასავლეთის მმართვის ინსტიტუტის ფინანსური მხარდაჭერით ხორციელდება. „სამუშაო რეჟიმში საკრებულოს თავმჯდომარესა და წევრებთან ერთად განვიხილეთ ანგარიშის ფორმატის სამუშაო ვერსია. მივიღეთ მათგან მოსაზრებები და ასევე ველოდებით დამატებით მოსაზრებებს, რომელიც აუცილებლად იქნება გათვალისწინებული“, უთხრა რადიო „ათინათს“ ახალგაზრდა ეკონომისტთა ასოციაციის იმერეთის ოფისის ხელმძღვანელმა პაატა კლდიაშვილმა. კოალიციურ პროექტი „გამჭვირვალე თვითმმართველობა“ 7 ქალაქსა და მუნიციპალიტეტში ხორციელდება. პროექტის ფარგლებში დაგეგმილი შეხვედრები დღეს, 20 მარტს  ზუგდიდან დაიწო.